रुग्णवाहिकेने घेतला पेट, जीवितहानी नाही

म. टा. वृत्तसेवा, चांदवड

मुंबई-आग्रा महामार्गावर मालेगावकडून नाशिकच्या दिशेने रुग्णाला घेऊन जाणारी रुग्णवाहिका चांदवड शिवारात अचानक पेटली. सुदैवाने यात कुठलीही जीवितहानी झाली नाही. मात्र या घटनेत रुग्णवाहिका जळून खाक झाली.

नामपूर रुग्णालयाची १०८ क्रमांकाच्या रुग्णवाहिके चांदवड शिवारात अचानक पेट घेतला. या घटनेत ऑक्सिजन सीलिंडरचा स्फोट झाला. या स्फोटाने परिसर हादरला. त्याचे हादरे आजूबाजूच्या परिसरात जाणवले. या घटनेनंतर चांदवडच्या उमराणे येथील १०८ क्रमांकाच्या रुग्णवाहिकेने तत्काळ तेथे धाव घेतली आणि रुग्णाला व डॉक्टरांना सुखरूप नाशिककडे रवाना केले. या ठिकाणी रात्री उशिरापर्यंत आगीवर नियंत्रण मिळवण्यासाठी मदतकार्य सुरू होतं. १०८ क्रमांकाच्या रुग्णवाहिकेला आग कशामुळे लागली, याची माहिती कळू शकली नाही. यामुळे वाहतुकीचा खोळंबा होऊन वाहनांच्या लांबच लांब रांगा लागल्या होत्या.