म. टा. प्रतिनिधी, नाशिक
राज्यात होणाऱ्या विविध खेळांच्या स्पर्धांमध्ये भारतीय जनता युवा मोर्चाच्या (भाजपयुमो) माध्यमातून ५० लाख युवक खेळणार असल्याची माहिती संघटनेचे राज्य प्रभारी संजय कौडगे यांनी दिली.
उत्तर महाराष्ट्र विभागीय बैठक वसंतस्मृती भाजपा कार्यालय, नाशिक येथे झाली. याप्रसंगी संघटनेचे प्रदेश सरचिटणीस आमदार उन्मेश पाटील, आमदार सीमा हिरे उपस्थित होते. बैठकीत संघटनात्मक कामकाजाचा आढावा घेण्यात आला. तसेच राज्यातील सर्व २८८ विधानसभा क्षेत्रात होणाऱ्या सी. एम. चषक संदर्भात नियोजन करण्यात आले. बैठकीला १० जिल्ह्यांचे अध्यक्ष, सरचिटणीस, मंडल अध्यक्ष तसेच सी. एम. चषक विधानसभा संयोजक व सहसंयोजक उपस्थित होते. सी. एम. चषकच्या माध्यमातून १० खेळांचे व ७ सांस्कृतिक कार्यक्रम होणार आहेत. यामध्ये आयुष्यमान भारत क्रिकेट, जलयुक्त शिवार हॉलीबॉल, शेतकरी सन्मान कब्बडी, सौभाग्य खो-खेा, उडान एथलेटिक्स, मुद्रा योजना बुध्दीबळ, स्वच्छ भारत कुस्ती, कौशल्य भारत कॅरम, मॅरेथॉन या खेळांचे व उज्ज्वला नृत्य स्पर्धा, जन-धन एकांकिका स्पर्धा, उजाला गायन स्पर्धा, ग्रामज्योती काव्यवाचन स्पर्धा, इंद्रधनुष्य चित्रकला स्पर्धा, मेक इन इंडिया रांगोळी स्पर्धा या सांस्कृतिक कार्यक्रमांचा समावेश करण्यात आला आहे.
सुरुवातील विधानसभा क्षेत्रात त्यानंतर जिल्हा व विभागस्तर आणि अंतिम टप्यात राज्यस्तरीय स्पर्धा होणार असून १२ जानेवारी रोजी स्वामी विवेकानंद जयंती या दिवशी स्पर्धेचे बक्षीस वितरण मुख्यमंत्री देवेंद्र फडणवीस यांच्या हस्ते होणार आहे. विजेते व उपविजेत्यांना रोख पारितोषिक तसेच विशेष चषक आणि पदके देण्यात येतील. या स्पर्धेत सहभागी होणाऱ्या सर्व खेळाडूंना मुख्यमंत्र्यांची स्वाक्षरी असलेले प्रमाणपत्र प्रदान करण्यात येईल. ७५ दिवस चालणाऱ्या या चषकाच्या यशस्वीतेसाठी राज्यातील ५० लाख खेळाडूंना जोडण्याचे काम कार्यकत्यांनी करावे, असे आवाहन बैठकीत करण्यात आले.