जेलच्या सुरक्षेसाठी ७० नवीन कर्मचारी

Dr. Balkrushna Shelar
नाशिक रोड ः कमी कर्मचारी संख्येमुळे पेचात सापडलेल्या नाशिकरोड मध्यवर्ती कारागृहात नवीन ७० कर्मचारी सेवेत रुजू झाल्याने सुरक्षेचे कोंदण लाभले आहे. त्यामध्ये ३० महिला आहेत. खडा पहारा देणाऱ्या महिला कर्मचाऱ्यांची कारागृहाच्या कानाकोपऱ्यावर करडी नजर आहे. त्यामुळे गैरप्रकारांना आळा बसल्याची माहिती कारागृह अधीक्षक रमेश कांबळे यांनी ‘मटा’ला दिली.
नाशिकरोड कारागृहात ३२०० कैदी आहेत. त्यामध्ये शिक्षा झालेल्या (पक्क्या) कैद्यांपेक्षा खटले चालू असलेल्या (कच्च्या) कैद्यांचा समावेश जास्त आहे. मंजूर कर्मचारी संख्या ३२० आहे. सरकारने भरतीच न केल्यामुळे सुरक्षा कमजोर पडली होती. ८० कर्मचारी कमी असल्याने ३० होमगार्डसची मदत घेण्यात आली होती. कैद्यांना मोबाइल व सीम पुरवण्याच्या संशयावरुन होमगार्डसला अटक होण्याच्या घटना दोनवेळा घडल्यामुळे होमगार्डसची सुट्टी करण्यात आली. त्यानंतर सुरक्षेवर ताण आला होता. कैद्यांच्या हाणामाऱ्या, खून, रक्षकांवर हल्ले, पलायन आदी प्रकार घडले होते. पोलिस व कारागृह महानिरीक्षकांनी छापा टाकूनही फरक पडला नव्हता. कारागृहात गेल्या डिसेंबरमध्ये तब्बल ४० मोबाइल सापडले होते. त्यानंतर सरकारने सुरक्षेचा मुद्दा गांभीर्याने घेऊन नवीन कर्मचारी नियुक्त केले.

महसुलाचा विक्रम
मार्च २०१६ ला संपलेल्या आर्थिक वर्षात आठ विभाग असलेल्या जेलच्या कारखान्याने चार कोटी ३४ लाखांचा विक्रमी महसूल मिळवला. कैद्यांनी केलेल्या सतरंज्या लंडनला निर्यात झाल्या आहेत. ब्रिट‌िशांनी १९२७ साली स्थापन केलेल्या या जेलकडे २२५ एकर जागा आहे. ९८ एकर शेतीमध्ये २४.७२ हेक्टर बागायती आणि १४.१८ एकर जिरायती आहे. ६.६४ हेक्टरवर वनीकरण आहे. या जागेतील गटक्रमांक १६मधील बगीचा व चिमण बगीचा ही ११३ एकरची जागा खुल्या कारागृहाला देण्याचा प्रस्ताव पाठविण्यात आला आहे.

भिंतींवरही महिला कर्मचारी तैनात

कारागृहाच्या भिंतीवरुन मोबाइल आत फेकण्याचे तसेच कैद्यांच्या नातेवाईकांकडून मोबाइल आत जाण्याचे प्रमाण वाढल्याने महिला कर्मचाऱ्यांना गेट आणि मुख्य जागी नियुक्त करण्यात आले आहे. कारागृहाचे मनोरे आणि भिंतीवर त्यांना तैनात करण्यात आले आहे. त्यांच्या जोडीला सीसीटीव्ही कॅमेरे आहेत. मुख्य व अन्य प्रवेशद्वारांवरही महिला कर्मचारी आहेत. नवीन कर्मचारी पुणे, औरंगाबाद, मुंबईहून कुटुंबियांसह आले आहेत. कारागृह प्रशासनाकडे १५० क्वार्टर असून नवीन कर्मचाऱ्यांना शासकीय निवासस्थाने अपुरी पडत आहेत. मात्र, महिला कर्मचाऱ्यांची प्रशासनाने प्राधान्याने सोय केली आहे. नवीन पुरुष कर्मचाऱ्यांची सोय कारागृहाच्या मंगल कार्यालयात तात्पुरती केलेली आहे.