'अभय'मधून ११ कोटी
करोनामुळे घरपट्टीच्या थकबाकीचा डोंगर तीनशे कोटींवर गेल्याने या थकबाकी वसुलीसाठी महापालिकेने १६ नोव्हेंबरपासून सुरू केलेल्या अभय योजनेला चांगला प्रतिसाद मिळाला आहे.
म. टा. खास प्रतिनिधी, नाशिक
करोनामुळे घरपट्टीच्या थकबाकीचा डोंगर तीनशे कोटींवर गेल्याने या थकबाकी वसुलीसाठी महापालिकेने १६ नोव्हेंबरपासून सुरू केलेल्या अभय योजनेला चांगला प्रतिसाद मिळाला आहे. महिनाभरात या योजनेतून महापालिकेच्या तिजोरीत ११ कोटी रुपये जमा झाले आहेत. तर व्याज व दंडमाफी प्रकरणात महापालिकेला ९८ लाखांचा परतावा नागरिकांना द्यावा लागला आहे.
करोनामुळे महापालिकेच्या करवसुलीला सलग दुसऱ्या वर्षीही मोठा फटका बसला आहे. प्रामुख्याने घरपट्टी, पाणीपट्टी वसुलीत कमालीची घट झाली आहे. करोनामुळे नागरिकांनी घरपट्टीसह पाणीपट्टी भरण्याकडे पाठ फिरवली आहे. त्यामुळे घरपट्टीच्या थकबाकीचा डोंगर हा २८५ कोटींपर्यंत पोहचला आहे. सलग दुसऱ्या वर्षी घरपट्टीची वसुली रखडल्याने महापालिकेने अधिकची वसुली करण्यासाठी प्रथम करसवलत योजना जाहीर केली. परंतु, या योजनेला फारसा प्रतिसाद मिळाला नाही. करोनामुळे अनेक लोकांचा रोजगार हिरावल्याने घरपट्टी वसुलीसाठी महापालिकेने सक्तीची मोहीम राबविलेली नाही. याउलट घरपट्टी थकबाकी वसुलीसाठी महापालिका आयुक्त कैलास जाधव यांनी अभय योजना राबविण्याचा दिलासादायक निर्णय घेतला. गतवर्षी अभय योजनेच्या माध्यमातून महापालिकेला ३३ कोटी रुपयांचा महसूल मिळाला होता. यंदा १५ ऑगस्टपासून या योजनेची अंमलबजावणी सुरू केली गेली.
...अशी आहे योजना
अभय योजना तीन टप्प्यात असणार आहे. त्याअंतर्गत पहिल्या टप्प्यात दंड व नोटीस फीच्या रकमेत ९० टक्के, दुसऱ्या टप्प्यात ७० टक्के तर तिसऱ्या टप्प्यात ५० टक्के सूट दिली जाणार आहे. गेल्या वर्षाच्या तुलनेत यंदा चांगला प्रतिसाद मिळाला आहे. महिनाभरात महापालिकेच्या तिजोरीत ११ कोटी रुपये जमा झाले आहेत. मात्र, हा आकडाही समाधानकारक नसल्याने पुढच्या वर्षापासून महापालिकेला वसुली वाढविण्यासाठी अधिक कष्ट घ्यावे लागणार आहेत.
'पूर्व'मधून सर्वाधिक परतावा
अभय योजनेच्या माध्यमातून शास्ती व नोटीस फी मध्ये ९० टक्के सूट दिल्याने नागरिकांना ९७ लाख ९८ हजार ३४० रुपयांचा परतावा मिळाला आहे. यात सर्वाधिक म्हणजे तब्बल २५ लाखांपेक्षा अधिक रक्कमेचा परतावा पूर्व विभागातून मिळाला आहे. सर्वात कमी म्हणजे सुमारे पाच लाख रुपये पश्चिम विभागातून परतावा देण्यात अला आहे.
परताव्याचा लेखाजोखा
विभाग ....... दिलेली रक्कम
पश्चिम : ५,२०,००० रुपये
सिडको : १३,२७,००० रुपये
सातपूर : १३,४७,००० रुपये
नाशिकरोड : १६,९९,००० रुपये
पंचवटी : २३,१७,००० रुपये
पूर्व विभाग : २५,८७,००० रुपये