नाशिकच्या वाईनची थायलंडमध्ये चढणार नशा

मटा ऑनलाइन वृत्त। नाशिक

देशाची वाईन राजधानी नाशिक आता पाच दिवसीय 'थायफेक्स' या आशियातील सर्वात मोठ्या 'फूड अँड बेवरेजेस एक्स्पो'मध्ये झळकण्यासाठी सज्ज आहे. बँकॉकमध्ये हा एक्स्पो ३१ मे ते ४ जून २०१७ या कालावधीत होणार आहे. विशेष म्हणजे नाशिकच्या उत्तम वाईनवर पहिल्यांदाच लघुपट तयार करण्यात आला असून त्याचे चित्रीकरण सोमा वाईन विलेजमध्ये पार पडले. या लघुपटाचा कालावधी २५ मिनिटांचा आहे.

या लघुपटात नाशिकच्या वाईनचा द्राक्षबागा ते उत्पादन निर्मितीच्या अंतिम टप्प्यापर्यंतचा रंजक प्रवास चित्रित करण्यात आला आहे.

भौगोलिक निर्देशनानुसार एकूण १० उत्पादने डिस्प्लेसाठी निवडण्यात आली होती. त्यापैकी तीन उत्पादनांची निवड लघुपटासाठी करण्यात आली, ज्यामध्ये नाशिकच्या वाईनचाही समावेश होता. वाईनव्यतिरिक्त अन्य दोन भारतीय उत्पादनांची निवड झाली, त्यात केरळचा नावारा तांदूळ आणि रत्नागिर, तसेच सिंधुदुर्गातील कोकमाचा समावेश आहे.

या एक्स्पोचे आयोजन थायलंडचे डिपार्टमेंट ऑफ इंटरनॅशनल ट्रेड प्रमोशन (डीआयटीपी), थाय चेंबर्स ऑफ कॉमर्स आणि व्यापारी प्रदर्शने भरवणारी कोयलनमेसी पीटीई लिमिटेड, सिंगापूर यांनी संयुक्तपणे केले आहे.

सोमा वाईन व्हिलेजचे सीएमडी प्रदीप पाच पाटील या बाबत बोलताना म्हणाले, ‘नाशिकमधल्या वाईन यार्डमध्ये (द्राक्षबागा) वाईन कशी तयार केली जाते, याविषयीचा २५ मिनिटांचा लघुपट जगातल्या सर्वांत मोठ्या व्यापारी प्रदर्शनात दाखवला जाणार आहे, ही नाशिककरांसाठी अत्यंत अभिमानाची बाब आहे. बँकॉक येथे होणाऱ्या जगातल्या सर्वांत मोठ्या अन्न व पेय व्यापार प्रदर्शनात ‘जीआय टॅग’सह नाशिकच्या वाईनची माहिती दाखवण्यात येणार आहे.’

या लघुपटाचे स्पेन येथील दिग्दर्शक बॅटिस्ट मायगॉल यांनी सांगितले की, ‘संघटित सरकार आणि असोसिएशन ऑफ युरोप यांच्या मदतीने आम्ही एक माहितीपट बनवत आहोत. बॅंकॉकमधल्या व्यापारी प्रदर्शनात हा माहितीपट दाखवण्यात येणार आहे. नाशिकची वाईन सर्वोत्कृष्ट का आहे, ती कशी बनवली जाते आणि तिला “जीआय टॅग” कशाबद्दल देण्यात आला आहे, यावर या माहितीपटाचा भर असणार आहे.’