VIDEO : नाशिकमध्ये भाजप नेत्याच्या घरावर टोळक्याचा हल्ला; घटना सीसीटीव्ही कॅमेऱ्यात कैद

नाशिक : भाजप कामगार आघाडीचे प्रदेश चिटणीस विक्रम नागरे यांच्या घरावर अज्ञातांकडून हल्ला करण्यात आला आहे. हातात चाकू, सुरे आणि पिस्तूल घेऊन नागरे यांच्या घरावर हल्ला चढवण्यात आला. सात ते आठ जणांच्या टोळक्याने दगडफेक करत घरामध्ये घुसण्याचा प्रयत्न केला. विक्रम नागरे हे यावेळी घरात नव्हते. मात्र त्यांच्या मातोश्रींना धमकावल्यानंतर सदर गुंड निघून गेले, अशी माहिती समोर आली आहे. ही घटना काही दिवसांपूर्वी घडलेली असली तरी आता या घटनेचं सीसीटीव्ही फुटेज समोर आलं आहे.

मिळालेल्या माहितीनुसार, सात ते आठ जणांच्या टोळक्याने सातपूर परिसरात राहणाऱ्या विक्रम नागरे यांच्या घराबाहेर लावलेले बॅनर देखील फाडले आहेत. तसंच परिसरातील नागरिकांना शिवीगाळ करत दहशत माजवली. वर्दळीच्या ठिकाणी असणाऱ्या राजकीय पदाधिकाऱ्याच्या घरावर हल्ला झाल्याने नागरिकांमध्ये प्रचंड भीतीचे वातावरण पसरले होते.



विक्रम नागरे हे या हल्ल्यावेळी घराबाहेर असल्याने ते बचावले आहे. याप्रकरणी ७ जणांवर पोलिसांकडून गुन्हा दाखल करण्यात आला असून संपूर्ण घटनेचा थरार सीसीटीव्ही कॅमेरात कैद झाला आहे.

दरम्यान, या परिसरात सात ते आठ जण काही काळ घुटमळत असल्याचं सीसीटीव्ही फुटेजच्या माध्यमातून दिसून येत आहेत. त्यानंतर ते रस्त्यावरील दगड उचलून घराकडे भिरकावताना देखील स्पष्ट होत आहे. रात्री ९:३० च्या सुमारास हा हल्ला झाला आहे. याप्रकरणातील आरोपींवर अटकेची कारवाई कधी होणार, हे पाहणं महत्त्वाचं ठरणार आहे.