मालेगावातून लाबंविला होता ३२ लाखांचा ऐवज
म. टा. वृत्तसेवा, मालेगाव
शहरातील छावणी पोलिस ठाणे हद्दीत १८ ऑक्टोबर रोजी रात्री सोनार झुंबरलाल बागुल यांना लूटणाऱ्या चोरट्यांना पोलिसांनी एक महिन्यात जेरबंद केले. बागुल सोन्याचे दागिने घेऊन घराकडे परतत असताना अज्ञात चोरट्यांनी त्यांना लूटले होते. त्यांची दुचाकी व ९६० ग्रॅम सोन्याचे दागिने असा एकूण ३२ लाख २१ हजाराचा मुद्देमाल लंपास केला. याप्रकरणी अखेर चोरट्यांना जेरबंद करण्यात छावणी पोलिसांना यश आले असून, ५ अट्टल गुन्हेगारांसह २१ लाख ६० हजार ७८४ रुपये किमतीचा मुद्देमाल पोलिसांनी हस्तगत केला आहे.
मंगळवारी (दि १९) येथील छावणी पोलिस ठाण्यात आयोजित पत्रकार परिषदेत पोलिसांनी या गुन्ह्याचा तपासाबाबत माहिती दिली. सोनार असलेल्या झुंबरलाल यांची लूटमार झाल्याने खळबळ उडाली. याप्रकरणी अपर पोलिस अधीक्षक संदीप घुगे यांच्या मार्गदर्शनाखाली छावणी पोलिस ठाण्याचे निरीक्षक प्रवीण वाडीले यांच्यासह पथकाने तपास सुरू केला. तपासादरम्यान पोलिसांनी सीसीटीव्ही फुटेज तपासले. मात्र हाती काहीच न लागल्याने त्यांच्यापुढे मोठे आव्हान उभे राहिले होते. अखेर खबऱ्यांकडून मिळालेल्या माहितीनंतर पोलिसांनी आरोपी भाग्येष भगवान महाले (रा. चंदनपुरी गेट, मालेगाव) यास चौकशीसाठी ताब्यात घेतले. त्याने चौकशी दरम्यान गणेश राजेंद्र वडगे (रा. सावता चौक, मालेगाव) व उबेद उर्फ शमासोद्दिन अन्सारी (रा. काकुबाईचा बाग, मालेगाव) यांच्या साथीने गुन्हा केल्याचे कबूल केले. दरम्यान पोलिसांनी या दोन्ही आरोपींना देखील शिताफीने जेरबंद केले.
पोलिसांचा सुरतमध्ये तपास
या तिघांची कसून चौकशी केल्यानंतर याप्रकरणात अन्य ६ आरोपी असून, ते गुजरात राज्यात लपून बसल्याची माहिती समोर आली. गुन्हेगारांचा शोध घेण्यासाठी मालेगाव पोलिस १० दिवस सुरत शहरात तळ ठोकून होते. पोलिसांनी सुरत येथून आसिफ इकबाल सईद अहमद (रा. रमजानपुरा) व जिषान अहमद नफिस अहमद (रा. कुसुंबा रोड, मालेगाव) या दोघांना अटक करून मालेगावी आणले. त्यांनी चोरी केलेला माल नाशिक येथील मनीष रवींद्र सोनार यास विकल्याची कबुली दिली.
चौघांचा शोध सुरू
पोलिसांनी एक पथक नाशिक येथे रवाना करून गुन्ह्यात विकलेले २१ लाख ६० हजार ७८४ रुपये किमतीचे सोने हस्तगत केले. तसेच शहरानजीक म्हाळदे शिवारातून एक बेवारस दुचाकी देखील हस्तगत करण्यात आली आहे. याप्रकरणातील अन्य चार आरोपींचा शोध पोलिस घेत आहेत. पोलिस उपनिरीक्षक गणेश आखाडे, पोलिस नाईक अविनाश राठोड, पोलिस शिपाई पंकज भोये, नितीन बाराहाते, नरेंद्रकुमार कोळी, संजय पाटील, संदीप राठोड आदींनी कारवाई बजावली.