तुटपुंज्या कमाईतही मदतीचा हात

रिक्षाचालक करतोय विद्यार्थ्यांना मदत

म. टा. प्रतिनिधी, नाशिक

वडील मोलमजुरी करायचे, तर आई चार घरची धुणीभांडी. त्यावेळी जेमतेम घर खर्च निघायचा. तीन भावंडांच्या शिक्षणाचा खर्च वडिलांना पेलवणारा नव्हता. अशा वेळी घरात मी मोठा असल्याने घरखर्चाला हातभार लावू, या उद्देशाने एका कापड दुकानात कामाला लागलो. दोघा भावांचे शिक्षण पूर्ण केले. परिस्थितीअभावी मला शिक्षण घेता आले नाही. यामुळे माझ्यासारखे कुणी शिक्षणापासून वंचित राहू नये, म्हणून मी गेल्या वर्षापासून 'मटा हेल्पलाइन' उपक्रमातील विद्यार्थ्यांना मदत करीत आहे. तुम्हीही या गरजू विद्यार्थ्यांच्या उज्ज्वल भविष्यासाठी मदत करा, असे आवाहन एका रिक्षाचालकाने केले आहे.

घरची परिस्थिती बेताची होती. पंचवटीतल्या एका वाड्यात रहात होतो. वडील गावात मिळेल ते काम करायचे. आई चार घरची धुणी भांडी करायची. बुधवारच्या बाजारात उरलेला भाजीपाला स्वस्तात मिळायचा म्हणून मुद्दाम उशिराने भाजी घ्यायला जायचो. शाळेत जातांना पॅँट फाटलेली असायची. शाळेत पहिल्या १० मध्ये नंबर यायचा. दहावी पास झालो, मात्र हा आनंद वडिलांच्या चेहऱ्यावर नव्हता. मला पुढे कसे शिकवायचे ही चिंता होती. मला ती जाणवली म्हणून कुठेही अॅडमिशन न घेता एका कापड दुकानात कामाला लागलो. त्यानंतर छोटेमोठे व्यवसाय केले. आता माझी स्वत:ची रिक्षा आहे. परंतु, आपण शिकलो नाही ही खंत आजही मनात कायम आहे. त्यामुळेच फुल न फुलाची पाकळी म्हणून मी 'मटा हेल्पलाइन' उपक्रमातील विद्यार्थ्यांना गेल्या वर्षापासून मदत करीत आहे. 'मटा'ने सुरू केलेला हा उपक्रम खरोखरच स्तुत्य आहे. 'मटा'कडे मदतीचे चेक दिल्यानंतर त्या विद्यार्थ्यांच्या आयुष्यात निश्चित फरक पडणार आहे. समाजानेही त्यांच्या शिक्षणाला हातभार लावावा. मला जितक्या लोकांना शक्य आहे, तितक्या लोकांना मी सांगत आहे. दहाही गरजू विद्यार्थ्यांचे स्वप्न साकार होण्यासाठी तुम्हीही मदत करा, असे आवाहन या रिक्षाचालकाने केले आहे.

- संबंधित वृत्त...२