म. टा. वृत्तसेवा, सातपूर
छत्रपती शिवाजी महाराज यांचा जयंती उत्सव सातपूर भागात सर्वपक्षीय साजरा केला जातो. शिवजन्मोत्सव समितीच्या वतीने मिरवणुकीला फाटा देत शिवायन महानाट्याचे आयोजन अशोकनगरच्या जाणता राजा मैदानात करण्यात आले होते. या महानाट्याद्वारे शिवप्रेमींनी शिवरायांची शौर्यगाथा अनुभवली.
सुरुवातीला मान्यवरांचे स्वागत शिवजन्मोत्सव सोहळा समितीचे अध्यक्ष किशोर निकम, कार्याध्यक्ष नगरसेविका इंदूबाई नागरे यांनी केले. गणपती, तुळजाभवानी माता व शिवरायांच्या आरतीने शिवायन महानाट्याची सुरुवात करण्यात आली. पुणे येथील सात्विक ठाकूर व मयूर घोलप यांच्या समूहाने शिवायन महानाट्याचे सादरीकरण केले.
शिवायन महानाट्याच्या सुरुवातीला महाराष्ट्रीयन परंपरा, संस्कृती, तुकारामांच्या गाथा आदींची माहिती कलाकारांनी सादर केली. यानंतर मुघल सत्ताधाऱ्यांकडून हिंदू जनतेला दिल्या जाणाऱ्या हिंसक त्रासाची माहिती दाखविण्यात आली. हिंदू जनतेवर होणारे अत्याचार बघता राजमाता जिजाऊ यांनी आई तुळजा भवानींकडे पुत्रप्राप्तीची मागणी केली. भवानी मातेने जिजाऊंची इच्छा पूर्ण करीत शिवनेरी गडावर शिवरायांना जन्म दिला. बालपणापासूनच शिवरायांना युद्धनिती व गनिमा काव्याचे धडे माता जिजाऊ यांच्याकडून मिळाल्याचे नाट्याद्वारे दाखविण्यात आले. शिवाजी महाराजांनी रयतेश्वर महादेव मंदिरात हिंदवी स्वराज्य स्थापन करण्याची शपथ घेतली. यानंतर बाराबलुतेदारांना बरोबर घेत शिवरायांनी एक, एक किल्ले सर करण्यास सुरुवात केली. शिवाजी महाराजांचा इतिहास कलाकारांकडून योग्य सादरीकरण होत असताना जाणता राजा मैदानात एकच शांतता पसरली होती.
शिवायन महानाट्यात अफजल खानाच्या वधाने लक्ष वेधले. खानाचा वध झाल्यावर उपस्थित प्रेक्षकांकडून जय भवानी, जय शिवाजी अशा जोरदार घोषणा देण्यात आल्या.
याप्रसंगी खासदार हेमंत गोडसे, माजी खासदार समीर भुजबळ, आमदार सीमा हिरे, नगरसेवक दिनकर पाटील, शशिकांत जाधव, सलिम शेख, शिवसेना गटनेते विलास शिंदे, आरपीआय गटनेत्या दीक्षा लोंढे, नगरसेवक मधुकर जाधव, उद्योजक दिलीप गिरासे, नगरसेविका माधुरी बोलकर, पल्लवी पाटील, डॉ. वर्षा भालेराव, कामगारनेते डॉ. डी. एल. कराड, डॉ. अमोल वाजे, माजी नगरसेवक नंदू जाधव, विक्रम नागरे यांसह सर्वच पक्षातील पदाधिकारी व कार्यकर्ते उपस्थित होते.
शिवजन्मोत्सव सोहळ्याच्या यशस्वीतेसाठी नितीन निगळ, गौरव जाधव, समाधान देवरे, हिरामण रोकडे, अजय थोरात, अनिल गडाख, शिवाजी शिंदे, सुरेश खांडबहाले आदींनी परिश्रम घेतले.