माझ्याशी लग्न कर; ताईकडे सतत तगादा लावणाऱ्या तरुणावर भाऊ संतापला अन् भर चौकातच...

नाशिक : बहिणीकडे लग्नाचा तगादा लावणाऱ्या तरुणाची मुलीच्या भावाने धारदार शस्त्राने हत्या केल्याची घटना नाशिक शहरातील पंचवटी परिसरात घडली आहे. या प्रकरणी पोलिसांनी गुन्हा नोंदवत संशयितास ताब्यात घेतलं आहे.

याबाबत मिळालेल्या अधिक माहिती अशी की, मयत विकास रमेश नलावडे ( वय २७) निलगिरी बाग परिसरात राहत होता. याच परिसरातील एका तरुणीवर विकास याचे प्रेम होते. त्याला सदर तरुणीसोबत लग्न करायचे होते. त्यामुळे विकासने संशयित आरोपीच्या बहिणीकडे सतत लग्नासाठी तगादा लावला होता. ही बाब मुलीच्या भावाला समजली आणि त्याला राग अनावर झाला. रागाच्या भरात त्याने २२ फेब्रुवारी रोजी रात्री १०.३० वाजेच्या सुमारास निलगिरी बाग परिसरातील बिल्डिंग नंबर ५ समोर असलेल्या मोकळ्या जागेत तू माझ्या बहिणीशी लग्न करायचे असे का बोलतो. असं विचारत विकास रमेश नलावडे यास संशयित अमोल साळवे आणि त्याच्या दोन साथीदार यांनी लाथा बुक्क्यांनी मारहाण केली.

२ कोटींचा विमा मिळवण्यासाठी महिलेचा जुगाड; मुलाचा मृत्यू दाखला दिला, पण एका चुकीने बिंग फुटले

यावेळी अमोल साळवे याने धारदार शस्त्राने विकासच्या पोटात आणि डोक्यात जबर वार करून त्यास गंभीर जखमी केले. रक्ताच्या थारोळ्यात पडलेल्या विकासला डॉ. वसंतराव पवार वैद्यकीय महाविद्यालयात उपचारासाठी दाखल करण्यात आले. परंतु उपचारादरम्यान त्याचा मृत्यू झाला. या प्रकरणी पोलिसांनी संशयित अमोल वसंत साळवे यास ताब्यात घेतले. त्याच्याकडे कसून चौकशी केल्यानंतर त्याच्यासोबत त्याचा मामा संशयित सुनील मोरे आणि त्याचा दाजी संशयित राहुल भीमराव उजगीरे हे देखील असल्याचे सांगितले. या जबाबानुसार पोलिसांच्या गुन्हे शोध पथकाने सुनील मोरे यास ताब्यात घेतले असून राहुल उजागिरे हा हॉस्पिटलमध्ये अॅडमिट असून त्याच्यावर उपचार सुरू असल्याची माहिती पोलिसांकडून देण्यात आली आहे.

दरम्यान, नाशिक शहरात गेल्या दोन दिवसात तीन खुनाच्या घटना घडल्या आहेत. दारूच्या नशेत पतीने पत्नीला मारहाण केल्याने पत्नीचा मृत्यू झाला आहे तर दुसऱ्या घटनेत पतीने चारित्र्याच्या संशयावरून पत्नीची हत्या करत स्वतः आत्महत्या केली आहे तर तिसऱ्या घटनेत बहिणीकडे लग्नासाठी तगादा लावण्याच्या कारणातून भावाने तरुणाची हत्या केली आहे. या घटनेमुळे नाशिक शहर हादरून गेले आहे.