‘आधार’ शोधणार बोगस डॉक्टर

arvind.jadhav @timesgroup.com

Tweet : @ArvindJadhavMT

नाशिक : राज्यातील अॅलोपॅथी डॉक्टर्सना महाराष्ट्र मेडिकल कौन्सिलने आधार कार्डची माहिती नोंदविण्याचे आदेश दिले आहेत. त्यामुळे अॅलोपॅथीची प्रॅक्टिस करणाऱ्या बोगस डॉक्टरांची मोठी संख्या समोर येण्याची शक्यता आहे. हाच डेटाबेस नॅशनल मेडिकल रजिस्ट्रीसाठी वापरण्यात येणार असून, मेडिकल कौन्सिल ऑफ इंडियाने डिजिटल मिशन मोड प्रोजेक्टअंतर्गत ही प्रक्रिया सुरू केली आहे.

राज्यात अॅलोपॅथीचा वापर करणाऱ्या परवानाप्राप्त डॉक्टरांची संख्या सव्वालाखाच्या आसपास आहे. मात्र, काही वर्षांपासून बोगस डॉक्टरांचा सुळसुळाट झाला आहे. अॅलोपॅथीचे शिक्षण न घेतलेल्या अथवा कोणतीही पदवी नसलेल्या व्यक्ती सरळ अॅलोपॅथी पद्धतीने पेशंटवर उपचार करतात. या पार्श्वभूमीवर इंडियन मेडिकल असोसिएशनने परवानाप्राप्त डॉक्टरांचे आधार कार्ड महाराष्ट्र मेडिकल कौन्सिलकडे लिंक करण्यास सांगितले आहे.

याबाबत बोलताना आयएमएचे नाशिकचे अध्यक्ष डॉ. मंगेश थेटे यांनी सांगितले, की बोगस डॉक्टरांना आळा बसावा यासाठी हा निर्णय फारच महत्त्वाचा आहे. अनेकदा राज्यातील व्यक्ती परराज्यात तर परराज्यातील बोगस व्यक्ती डॉक्टर्स म्हणून प्रॅक्टिस करतात. अशा समाजकंटकांचा शोध लागावा, म्हणून हे पाऊल उचलण्यात आले असून, त्याचे स्वागत करीत असल्याचे त्यांनी स्पष्ट केले.

नाशिकचा विचार करता जवळपास तीन हजार डॉक्टर्स कार्यरत आहेत. येत्या काही दिवसांत नॅशनल मेडिकल रजिस्ट्रीच्या निर्णयाची अंमलबजावणी होऊ शकते. यामुळे देशभरात एका डॉक्टरची एकदाच नोंद होणार आहे, तसेच तो डॉक्टर देशभरात कोठेही प्रॅक्टिस करू शकणार आहे. यामुळे परवानाधारक डॉक्टरांची नोंद होणे आवश्यक असून, आधार लिंक करण्याची प्रक्रिया याचसाठी महत्त्वाची ठरते.

--

या ठिकाणी आधार नोंदणी

संबंधित डॉक्टरांनी www.maharashtra medicalcouncil.in या वेबसाइटवर आरएमपी यावर क्लिक करून आधार कार्ड लिंक करून स्वहस्ताक्षर असलेले आधार कार्ड अपलोड करावे. स्वहस्ताक्षर असलेल्या आधार कार्डची कॉपी महाराष्ट्र मेडिकल कौन्सिलच्या पत्त्यावर स्वहस्ते अथवा पोस्टाने पाठवून द्यावी. इंडियन मेडिकल असोसिएशनच्या नाशिक विभागाने या निर्णयाचे स्वागत करीत सदर प्रक्रिया पूर्ण करण्याचे आवाहन केले आहे. याकडे दुर्लक्ष करणाऱ्या डॉक्टरांचे परवानेदेखील रद्द होऊ शकतात.