हजार विद्यार्थ्यांची स्कॉलरशिपला दांडी

म. टा. प्रतिनिधी, नाशिक

महाराष्ट्र राज्य परीक्षा परिषदेच्या वतीने पाचवी व आठवीच्या विद्यार्थ्यांसाठी रविवारी झालेल्या परीक्षेत जिल्हाभरात सुमारे ११२१ विद्यार्थ्यांनी दांडी मारली. जिल्ह्यामध्ये पाचवीसाठी १५३ केंद्रांवर, तर आठवीसाठी १२४ केंद्रांवर रविवारी ही परीक्षा झाली. सकाळी ११ ते १२.३० व दुपारी १.३० ते ३ या वेळेत ही परीक्षा विविध केंद्रांवर झाली. जिल्ह्यात पाचवी व आठवीतील एकूण ४३ हजार ३२४ विद्यार्थ्यांपैकी ४२ हजारांवर विद्यार्थ्यांनी परीक्षा दिली, तर सुमारे एक हजार विद्यार्थी परीक्षेला गैरहजर होते.

परीक्षेदरम्यान शिक्षणाधिकाऱ्यांच्या पथकाने विविध शाळांनी भेटी देऊन पाहणी केली. जिल्ह्यातील ४३ हजार ३२४ विद्यार्थ्यांनी ही परीक्षा दिली. पाचवीतील २४ हजार ७५८ विद्यार्थ्यांनी नोंदणी केली होती. पैकी २४ हजार १२२ विद्यार्थ्यांनी परीक्षा दिली. ६३६ विद्यार्थी यात अनुपस्थित होते. ही परीक्षा जिल्ह्यातील १५३ केंद्रांवर पार पडली. यासाठी १५३ केंद्र संचालक आणि ११ उपकेंद्र संचालकांसह १२२३ पर्यवेक्षकांनी काम पाहिले.

आठवीमधून १९ हजार ५१ विद्यार्थ्यांनी परीक्षेसाठी नोंदणी केली होती. पैकी १८ हजार ५६६ विद्यार्थ्यांनी परीक्षा दिली. ४८५ विद्यार्थी गैरहजर होते. १२४ केंद्रांवर १२४ केंद्र संचालक आणि ७ उपकेंद्र संचालकांसह ९४४ पर्यवेक्षकांनी परीक्षेचे नियोजन केले.

परीक्षेसाठी प्रथम भाषा, गणित, तृतीय भाषा, बुद्धिमत्ता चाचणी या विषयांवर ३०० गुणांसाठी ही परीक्षा घेण्यात आली. यामध्ये ३० टक्के सोप्या स्वरूपाचे प्रश्न, ४० टक्के मध्यम स्वरूपाचे, तर ३० टक्के कठीण स्वरूपाचे प्रश्न असे प्रश्नपत्रिकेचे स्वरूप होते. नाशिक महापालिका क्षेत्रात पाचवीसाठी ३० आणि आठवीसाठी २८ केंद्रांवर परीक्षेचे नियोजन करण्यात आले. प्राथमिक शिक्षणाधिकारी वैशाली झनकर, परीक्षेचे जिल्हा समन्वयक प्रमोद चिंचोले आदींच्या पथकांनी परीक्षेदरम्यान डी. डी. बिटको शाळा, मराठा हायस्कूल, होरायझन स्कूल आदी परीक्षा केंद्रांना भेट देऊन पाहणी केली.