तडीपार कायद्यातील तरतुदींनुसार कारवाई
arvind.jadhav@timesgroup.com
Tweet: @ArvindJadhavMT
नाशिक : परजिल्ह्यात वास्तव्यास असताना शहरात येऊन गुन्हे करणाऱ्या गुन्हेगारांना शहर पोलिसांनी रडारवर घेतले आहे. अशा गुन्हेगारांना तडीपार कायद्यातील तरतुदीनुसार कारवाई करून शहरात प्रवेश नाकारण्यात आला आहे. नियमाचे उल्लंघन करणाऱ्यांवर मुंबई पोलिस अॅक्टमधील कलम १४२ नुसार कारवाई करण्यात येणार आहे.
शहरात जबरीचोरीसह चेन स्नॅचिंगच्या घटनांमध्ये काही दिवसांपासून वाढ झाली आहे. पोलिस बंदोबस्तात गुंतल्याचा फायदा थेट चोरट्यांना मिळतो. या पार्श्वभूमीवर परजिल्ह्यातून येणाऱ्या गुन्हेगारांचा 'बंदोबस्त' करण्याचा निर्णय पोलिस आयुक्त विश्वास नांगरे पाटील यांनी घेतला आहे. याबाबत नांगरे पाटील यांनी सांगितले, की शहरातील गुन्हेगारांवर मोक्का, स्थानबद्धता तसेच तडीपारीची कारवाई सातत्याने केली जात आहे. स्थानिक गुन्हेगारांना फारसा वाव नसल्याने सध्याच्या घटनांना परजिल्ह्यातील गुन्हेगार कारणीभूत असल्याचे दिसते. तसे पुरावे समोर आले आहेत. अशा गुन्हेगारांना रोखण्यासाठी तडीपारीच्या कायद्यातील तरतुदींचा प्रथमच वापर करण्यात येणार आहे. तडीपारीच्या कारवाईमध्ये गुन्हेगारांना एका शहरातून दुसऱ्या शहरात पाठविण्यात येते. मात्र, परजिल्ह्यातील गुन्हेगारांवर नाशिक शहरात गुन्हा केला म्हणून कोणतीही प्रतिबंधात्मक कारवाई होत नव्हती. मात्र, आता या परजिल्ह्यातील गुन्हेगारांना तडीपारीच्या नोटिसा बजावण्यात येणार आहे. या नोटिसीच्या आधारे त्यांना सक्षम अधिकाऱ्याच्या परवानगी शिवाय शहरात प्रवेश नाकारण्यात येणार आहे. याबाबत सर्वच पोलिस ठाण्याच्या अधिकाऱ्यांना सूचना देण्यात आल्या आहेत. या नियमाचे उल्लंघन करणाऱ्यांवर मुंबई पोलिस अॅक्टमधील कलम १४२ प्रमाणे कारवाई केली जाईल, असेही पोलिस आयुक्तांनी स्पष्ट केले.
गुन्ह्यांवर बसणार वेसण
चेन स्नॅचिंग, घरफोडी, जबरी चोरी यासारख्या गुन्ह्यांमध्ये परजिल्ह्यातील गुन्हेगार समाविष्ट असतात. जेलमध्ये नातेवाइकांना भेटण्यासाठी येणारे गुन्हेगार, एका जिल्ह्यातून दुसऱ्या जिल्ह्यात काही कामानिमित्त प्रवास करून जाणारे गुन्हेगार सहज गुन्हे करून पुढे जातात. विशेषत: श्रीरामपूर, कल्याण, आंबिवली आदी भागातील चेन स्नॅचर्स यासाठी कुप्रसिद्ध आहेत. अशा गुन्हेगारांना रोखण्यासाठी ही कारवाई उपयुक्त ठरेल, असे पोलिस आयुक्त विश्वास नांगरे पाटील यांनी सांगितले.