वेगवेगळ्या अपघातात बालकासह दोघे ठार

म. टा. वृत्तसेवा, दिंडोरी / मनमाड
नाशिक-कळवण मार्गावर दिंडोरी जवळील हॉटेल राजयोग समोर दुपारी तीन वाजता दोन दुचाकींची समोरासमोर धडक झाल्याने एक जण ठार झाला. दोघे जण गंभीर जखमी झाले आहेत. मनमाड-लासलगाव मार्गावरील अन्य अपघातात आठ वर्षीय बालक ठार झाला.
नाशिक-कळवण मार्गावरील हॉटेल राजयोगसमोर रविवारी दुपारी तीन वाजेच्या सुमारास बजाज दुचाकी (एमएच १५ एटी ६५०५) आणि हिरो होंडा (एमएच १५ बीव्ही ४२१४) या दुचाकींची समोरा-समोर धडक झाली. यात विजय सोमाभाई दाभोर (रा. कोटा पंचमहाड, गुजरात) हे जागीच ठार झाले. तर चंदर देवराम वाघमारे व अन्य एक जण गंभीर जखमी झाले. घटनेचे वृत्त समजताच दिंडोरी पोलिस स्टेशनचे सहाय्यक पोलिस उपनिरीक्षक वाघ, आव्हाड यांनी घटनास्थळी तात्काळ धाव घेऊन जखमींना सिव्हिल हॉस्पिटलमध्ये दाखल करण्यात आले. याबाबत पुढील तपास पो. नि. मधुकर गावीत यांच्या मार्गदर्शनाखाली करण्यात येत आहे.

बालकाला पिकअपची धडक
मनमाड : मनमाड-लासलगाव मार्गावर भारतनगर येथे पिकअपने धडक दिल्याने झालेल्या अपघातात आठ वर्षीय बालकाचा जागीच मृत्यू झाला. या प्रकरणी चांदवड पोलिस ठाण्यात गुन्हा दाखल करण्याचे काम रात्री उशिरापर्यंत सुरू होते. शाम अरुण माळी असे अपघातात ठार झालेल्या बालक नाव आहे. भारतनगर येथे घरासमोर खेळत असताना मनमाड-लासलगाव मार्गावरून जाणाऱ्या पिकअप वाहनाची धडक बसल्याने बालक ठार झाला. घटनेनंतर वाहनचालक फरार असून चांदवड पोलिस त्याचा शोध घेत आहेत. या प्रकरणी हवालदार चव्हाण पुढील तपास करीत आहेत.