पिंपळगाव परिसरात अपघात; दोन ठार

म. टा. वृत्तसेवा, पिंपळगाव बसवंत

पिंपळगाव बसवंत परिसरात मंगळवारी दुपारी तीनच्या सुमारास झालेल्या अपघातात दोन जण जागीच ठार झाले, तर दोन मुले जखमी झाली. मुंबई- आग्रा महामार्गावरील शिरवाडे फाटा परिसरात एक्सयूव्ही महिंद्रा आणि मोटारसायकलदरम्यान हा अपघात झाला. बापूसाहेब काशिनाथ भोसले (वय ५०, सारोळे) व योगेश केदू काळे (३०) अशी अपघातात ठार झालेल्या व्यक्तींची नावे आहेत.

शिरवाडे फाट्याजवळ बापूसाहेब भोसले मोटारसायकलने (एमएच१५/७२१६) जात असताना त्यांना मागून भरधाव येणाऱ्या महिंद्रा एक्सयूव्ही कारने (एमएच १२/एमएन ३१०४) जोरदार धडक दिली. यात भोसले जागीच ठार झाले. रस्त्याच्या कडेला उभ्या असलेल्या आणखी एका मोटारसायकलला (एमएच १५/जीजे १७५१) कारची धडक बसली. यात मोटारसायकलवरील योगेश काळे जागीच ठार झाले. यात दोन मुले जखमी झाली असून, त्यांच्यावर खासगी रुग्णालयात उपचार सुरू आहेत. अपघातानंतर वाहनचालक पसार झाला. पिंपळगाव पोलिस ठाण्यात अपघाताची नोंद झाली असून, पोलिस निरीक्षक बिपीन शेवाळे तपास करीत आहेत.