आरोप-प्रत्यारोन अन् गोंधळ
महिंद्रा एम्प्लॉइज युनियनची सभा वादळी...
महिंद्रा एम्प्लॉइज युनियनची सभा वादळी
..
- युनियनची निवडणूक घेण्यावरून गोंधळ
- निवडणूक घेण्याचा ठराव
- युनियन कमिटी बरखास्त करण्याची मागणी
- कॅन्टीनमधील पदार्थांच्या दर्जावर आक्षेप
...
म. टा. खास प्रतिनिधी, नाशिक
महिंद्रा अॅण्ड महिंद्रा एम्प्लॉइजची वार्षिक सर्वसाधारण सभा युनियनची निवडणूक घेण्याच्या मुद्यावरून चांगलीच वादळी ठरली. या सभेत आरोप-प्रत्यारोप होऊन निवडणूक घेण्याचा ठरावही करण्यात आला. दुसरीकडे युनियनचे अध्यक्ष योगेश चव्हाण यांनी निवडणूक घटनेप्रमाणे होईल, असे सांगत ही सभा आटोपती घेतली. काही काळ गोंधळ व घोषणाबाजीत झालेल्या या सभेत सभासदांनी विद्यमान पदाधिकाऱ्यांवर आरोपही केले. सभा संपल्यानंतर अनेक सभासदांनी कामगार उपायुक्त यांच्याकडे धाव घेऊन युनियन कमिटी बरखास्त करण्याची मागणी केली.
कर्मवीर दादासाहेब गायकवाड सभागृहात झालेल्या या सभेत मोठ्या प्रमाणात महिंद्राचे कामगार उपस्थित होते. सकाळी सुरू झालेली ही सभा तब्बत तीन तास चालली. सभेच्या सुरुवातीस निवडणुकीच्या मुद्यावरून या सभेत गोंधळाला सुरुवात झाली. विद्यमान कार्यकारिणीने करारासाठी मुदतवाढ मागून नंतर राजीनामा न देता कारभार चालू ठेवल्याचा आरोपही या सभेत केला. युनियनचे पदाधिकारी हे व्यवस्थापनाबरोबर मिळाल्याचा आरोपही केला गेला. यावेळी कामगारांनी करार करताना युनियनचे पदाधिकारी गाजावाजा करतात. पण, नंतर कामगारांना न सांगता करार केला जातो. त्याबाबत वर्तमानपत्रातच बातमी येते. त्याबाबत कामगारांना काहीच माहिती नसते असे सांगण्यात आले. त्याचप्रमाणे कॅन्टीनमध्ये मिळणाऱ्या पदार्थांना दर्जा नाही, त्याकडे युनियनचे लक्ष नाही, कामगारांसाठी असलेले कामगारांसाठी असलेले स्टोअरही बंद करण्यात आले. त्याचप्रमाणे करारात अनेक गोष्टींकडे लक्ष दिले नाही. कामाबाबतीत होणाऱ्या अनेक तक्रारीही यावेळी मांडण्यात आल्या. घरकुल योजनेच्या पहिल्या व आताच्या पत्रकातील फोटोतील बदलावरही आक्षेप घेण्यात आला. दरम्यान, कामगारांनी दिलेल्या अर्जात युनियन कमिटी बरखास्त करून नवीन निवडणूक १५ दिवसांच्या आत घोषित करण्यात यावी. कामगारांच्या हिताकरिता हा निर्णय घेण्यात यावा, अशी मागणी करण्यात आली आहे.
या सर्व आरोपांना युनियनचे अध्यक्ष योगेश चव्हाण यांनी उत्तर देत त्याचे खंडन केले. आमचे काय चुकले, असा प्रश्न करतच त्यांनी आपली भूमिका मांडत सर्व आरोपांना उत्तरही दिले. युनियनने कामगारांसाठी केलेला करार असो की इतर गोष्टी त्या प्रामाणिकपणे केल्या आहेत. कामगारांसाठी असलेले स्टोअर केवळ जिल्हा बँकेत युनियनेचे २८ लाख अडकल्यामुळे बंद ठेवले आहे. त्याचप्रमाणे घरकुलच्या मॉडेलमध्ये बदल करण्यामागे महापालिकेचे विविध नियम असल्याचे सांगण्यात आले. कॅन्टीनची सुविधा इतर ठिकाणापेक्षा चांगली आहे असे सांगत त्यांनी आपली बाजू मांडली. यावेळी त्यांनी घटनेप्रमाणे निवडणुका घेऊ असे सांगत सभेची सांगता केली. त्यानंतर राष्ट्रगीत म्हणण्यास सुरुवात झाली व सभासदांना नंतर फारसे काही बोलताच आले नाही.
...
प्रतिसभा घेण्याची तयारी
सभा आटोपती घेतल्यानंतर पदाधिकारी बाहरे पडले. पण, सभासद सभागृहात थांबून राहिले. यावेळी निवडणूक घेण्याची घोषणा न केल्यामुळे त्यांनी नाराजी व्यक्त केली. यावेळी प्रतिसभा घेण्यासाठी काही जण व्यासपीठावर गेले. पण, नंतर कामगार आयुक्तांकडे तक्रार करण्याचा निर्णय झाला व सभा संपली.
...
विश्वासघाताचा आरोप
सभा संपल्यानंतर कामगार आयुक्तांकडे तक्रार करण्यासाठी कोरे फॉर्म सभासदांना वाटण्यात आले. त्यात युनियनच्या पदाधिकारींनी विश्वासघात केला आहे. १५ जुलै २०१७ रोजी सर्वसाधारण सभेत या पदाधिकाऱ्यांना करार होईपर्यंत मुदत वाढ दिली होती. पण, त्यांनी ही मुदत खोट्या पध्दतीने व चलाखीने वाढवून घेतल्याचे म्हटले आहे.