म. टा. वृत्तसेवा, मनमाड
मनमाड शहर परिसरात लॉकडाउन शिथिल केल्यानंतर रस्त्यावर उसळणारी गर्दी नियंत्रणात आणण्यासाठी आता मनमाड पोलिसांनी कायद्याच्या बडगा उगारला आहे. बेशिस्त नागरिकांवर दंडात्मक कारवाई करण्यासह पोलिसांनी बेशिस्त वाहनधारकांची वाहने जप्त केली आहेत.
मनमाडमध्ये नगिना मशिद परिसर, पाकिजा कॉर्नर, आंबेडकर चौक, शिवाजी चौक या ठिकाणी कडक बंदोबस्त आहे. या भागात येणाऱ्या जाणाऱ्या वाहनधारकांची तपासणी केली जात आहे. विनाकारण बाहेर पडणाऱ्या तसेच वाहनांची कागदपत्रे नसलेल्या नागरिकांना दंड करण्यात आला. पोलिसांनी ४५ जणांवर कारवाई केली व ५ हजार ८०० रुपयांची दंड वसुली केला. तसेच पाच वाहने जप्त केली आहेत. दरम्यान मनमाड नगिना मस्जिद येथून जाणारा मार्ग एकेरी करण्यात आला आहे. रात्री संचारबंदीत फिरणाऱ्या नागरिकांवर गुन्हे दाखल करण्यात येतील असेही पोलिस प्रशासनाने स्पष्ट केले आहे. लॉकडाउन शिथिल झाल्याने सुरक्षित वावरचा फज्जा उडाला.