आदिवासी बांधवांची दिवाळी 'गोड'

प्रा. भिमराव अवघडेंचा उपक्रम

म. टा. प्रतिनिधी, नाशिकः आदिवासी भागांतील पाड्यांवर अनेक सुविधांचा अजूनही अभाव आहे. अशा परिस्थितीत दसरा-दिवाळी सारखे सण मर्यादित स्वरूपात साजरे होतात. मात्र, या आदिवासी बांधवांची दिवाळी यंदा काहीशी गोड होणार आहे. प्रा. भिमराव अवघडे यांच्या प्रयत्नांतून इगतपुरी तालुक्यातील ४८ आदिवासी कुटुंबांना फराळी पदार्थांचे वाटप केले जाणार आहे. त्यांनी या कुटुंबांना दत्तक घेतले असून, दरवर्षी दिवाळीनिमित्त ते या मदत करत असतात.

मुळचे इगतपुरी तालुक्यातील पंढरपूरवाडी येथील असलेल्या प्रा. अवघडेंनी आदिवासी भागांतील नागरिकांची परिस्थिती अतिशय जवळून बघितली आहे. त्यांनी दिवाळीच्या निमित्ताने फराळ, आकाशकंदील आणि दिवे असलेले किट तयार केले आहे. आपल्या शाळा-महाविद्यालयांमधील मित्र आणि क्रीडा शिक्षकांच्या मदतीने तीन वर्षांपासून हा उपक्रम आयोजित करत आहेत. यासाठी ते सोशल मीडियाच्या माध्यमातून दानशूरांना अवघे दहा रुपये दान करण्याचे आवाहन करतात. यंदाही आदिवासींची दिवाळी गोड व्हावी म्हणून ते प्रयत्नशील आहेत. २८ ऑक्टोबरला ते ही मदत आदिवासी कुटुंबांपर्यंत पोहोचवणार आहेत.

दोन वर्ष किराणा वाटप

गेली दोन वर्षात ४८ आदिवासी कुटुंबांना प्रा. अवघडे यांनी महिनाभर पुरेल इतक्या किराणा साहित्याचे वाटप केले आहे. ज्या भागांत ग्रामपंचायत नाही आणि इतर सर्व सुखसोयींपासून वंचित असलेल्या गरजूंनाच ते मदत करत आहेत.

आदिवासी बांधवांसह दीपोत्सव साजरा करण्याचे यंदाचे तिसरे वर्ष आहे. गेली दोन वर्षे या ४८ कुटुंबांना महिनाभर पुरेल इतक्या किराणा साहित्याची वाटप केली. यंदा याच ४८ कुटुंबांना दीपोत्सवाच्या निमित्ताने फराळ, आकाशकंदील आणि दिव्यांचे वाटप करणार आहोत.

- प्रा. भिमराव अवघडे