कांद्यानंतर आता बटाटाही महागला

म. टा. प्रतिनिधी, नाशिक

घरातील भाजी संपली की गृहिणींच्या मदतीला धावून येतो तो बटाटा. अनेक जण तर प्रत्येक भाजीत बटाटा घालत असतात. कांदा इतकाच बटाटाही स्वयंपाकघरात गरजेचा असतो. कांदा दराने मेटाकुटीस आणले असतानाच बटाट्याच्या वाढत्या दराने गृहिणींच्या स्वयंपाकघराचे गणित बिघडवले आहे. जुन्या बटाट्याचे दर ३५ ते ४० रुपये, तर नव्या बटाट्याचे दर २५ ते ३० रुपयांपर्यंत पोहोचले आहेत.

नववर्ष सर्वसामान्यांना महागाईचे चटके देणारे ठरत असल्याचे दिसून येत आहे. तेल, गॅस, इंधन, डाळी, ज्वारी, बाजरी या जीवनावश्यक वस्तूंच्या दरात वाढ झाली असतानाच आता बटाटाही महागला आहे. कांदा दर थोडे आवाक्यात येत नाही तोच बटाट्याच्या दरातही झालेली वाढ सर्वसामान्यांचे आर्थिक गणित बिघडवणारी ठरत आहे. जुन्या बटाट्याचे दर ३५ ते ४० रुपये किलोपर्यंत पोहोचले आहेत. नवीन बटाटा बाजारात दाखल झाला असला तरी त्याचे दरही किलोला २५ ते ३० रुपये आहेत. यामुळे आता जीवनावश्यक वस्तू खरेदी करताना गृहिणींना हात आखडता घ्यावा लागत आहे.

भाजी संपल्यावर गृहिणींच्या मदतीला बटाटा धावून येतो. अनेक जण जवळपास प्रत्येक भाजीत बटाटा घालतात. फास्ट फूडमध्ये तर बटाटा अविभाज्य घटक झाला आहे. याशिवाय आता वेफर्स खरेदीसाठी बटाट्याची मागणी वाढणार आहे. यामुळे या दरवाढीचा फटका गृहिणींसोबत व्यावसायिकांनाही बसणार आहे.

आवकमध्ये घट

मध्य प्रदेश, उत्तर प्रदेशात सर्वाधिक बटाटा उत्पादन होते. महाराष्ट्रात पुणे जिल्ह्यातील तळेगावसह इतर अनेक जिल्ह्यात बटाट्याचे उत्पादन होते. रब्बी हंगामातील ऑक्टोबर महिन्यात लागवड झालेला बटाटा बाजारात दाखल होण्यास सुरुवात झाली आहे. मात्र, गेल्या महिन्याच्या तुलनेत आवक कमी आहे. यामुळे दरवाढ झाली आहे.

गवार ८० रुपये किलो

हिवाळ्यात गवारची भाजी आवडीने खाल्ली जाते. यामुळे मागणी वाढल्याने गवारचे दर ८० रुपये किलोपर्यंत पोहाचले आहेत. इतर भाज्यांचे दर मात्र ४० ते ५० रुपयांपर्यंत स्थिरावले आहेत. आवक चांगली असल्याने पालेभाज्यांचे दर टिकून आहेत.

पालेभाज्यांचे दर (प्रति जुडी)

मेथी... ८ ते १०

कोथिंबीर... १०

कांदापात...१५ ते २०

शेपू... ८ ते १०

....

फळ भाज्यांचे दर (प्रतिकिलो)

गवार... ८०

वांगे... ४०

कारले... ४०

गिलके... ३०

दोडके... ४०

मिरची.. ४०

घेवडा... ३०

गाजर... ३०

टोमॅटो... १०

काकडी...२०

ढोबळी मिरची...३०

भेंडी...४०

कोबी.... २० ला गड्डा

फ्लॉवर... २० ला गड्डा