घरात आढळली रोकड, दागिने, शेअर्स
म. टा. खास प्रतिनिधी, नाशिक
द्राक्ष निर्यातीसाठी आवश्यक फायटो परवाना देण्यासाठी एक लाख रुपयांची लाच घेणाऱ्या कृषी उपसंचालक नरेंद्रकुमार गोविंदराव आघाव यांना न्यायालयाने गुरुवारपर्यंत (दि. ५) पोलिस कोठडी सुनावली आहे. आघाव यांच्या घराची झडती घेतली असता घरी रोकड, सोन्याचे दागिने, डिमॅट खाते, शेअर्सचे कागदपत्रे, बँक पासबूक आढळल्याची माहिती पुढे आली आहे.
द्राक्षांची निर्यात करावयाची असेल तर त्यासाठी फायटो परवाना आवश्यक असतो. एका द्राक्ष निर्यातदाराने परवान्यासाठी कृषी विभागाकडे अर्ज केला होता. परवाना देण्याच्या मोबदल्यात कृषी उपसंचालक आघाव यांनी १ लाख ६४ हजार रुपयांची मागणी केल्याची तक्रार लाचलुचपत प्रतिबंधक विभागाकडे (एसीबी) नोंदविण्यात आली. तडजोडीअंती दीड लाख रुपये घेण्यास आघाव तयार झाल्याचेही तक्रारीत म्हटले. 'एसीबी'ने तक्रारीची शहानिशा करून सापळा रचला. आघाव यांना मंगळवारी (दि. ३) कार्यालयातच लाचेची एक लाख रुपये रक्कम स्वीकारताना पकडण्यात आले. भद्रकाली पोलिस स्टेशनमध्ये आघाव यांच्याविरोधात गुन्हा दाखल झाला होता. गोविंदनगर येथील आघाव यांच्या निवासस्थानाचीही रात्री उशिरापर्यंत झडती घेण्यात आली. त्यामध्ये दोन लाख रुपये रोख, दोन लाख रुपये किंमतीचे सोन्याचे दागिने, शेअर्ससह काही महत्त्वाची कागदपत्रे, पाच ते सहा बँकांमधील खात्याचे पासबूक आढळून आले. न्यायालयाने आघाव यांना दोन दिवसांची पोलिस कोठडी सुनावली आहे.