लाल कांदा दरात १५० ते २०० रुपयांची घसरण
...
- उमराणे येथे रास्तारोको
- मुंगसे येथे लिलाव बंद
....
टीम मटा
सरकारने अनुदान जाहीर केले असले तरी कांदा दरात मात्र घसरण सुरूच आहे. बुधवारी कांदा दरात १५० ते २०० रुपयांची घसरण झाल्याने शेतकऱ्यांचा संताप झाला. उमराणा येथे संतप्त शेतकऱ्यांनी रास्तारोको केला, तर मुंगसे येथे काही काळ लिलाव बंद पाडण्यात आले होते. सरकारविरोधी घोषणाबाजी करीत शेतकऱ्यांनी निषेध केला.
उमराणे बाजार समितीत बुधवारी कांदा दरात १५० ते ३०० रुपयांनी घसरण झाल्याने संतप्त शेतकऱ्यांनी सकाळपासून कांदा लिलाव बंद पाडले. तसेच, मुंबई-आग्रा महामार्गावर रास्तारोको केला. सोमवारी बाजारभाव सरासरी ९०० पर्यंत गेल्याने कांदाभावात एकदम ३०० रुपयांची घसरण का, असा संतप्त सवाल शेतकऱ्यांनी यावेळी व्यापाऱ्यांना केल्याने काही काळ तणावाचे वातावरण निर्माण झाले होते. मुंगसे बाजार समितीतही कांदा दरात अचानक झालेल्या घसरणीमुळे शेतकऱ्यांनी आक्रमक होत लिलाव बंद ठेवले होते. उमराणे येथील रास्तारोकोच्या पार्श्वभूमीवर मुंगसे बाजार आवारात पोलिस बंदोबस्त तैनात करण्यात आला होता. लासलगाव व पिंपळगाव बाजार समितीतही मंगळवारच्या तुलनेत बुधवारी लाल कांदा दरात २०० रुपयांनी घसरण झाल्याने शेतकऱ्यांनी नाराजी व्यक्त केली.
...
अनुदान अर्जाची मुदत आज संपणार
राज्य सरकारने १ नोव्हेंबर ते १५ डिसेंबर दरम्यान विक्री झालेल्या कांद्यावर क्विंटलमागे २०० रुपये अनुदान देण्याचे जाहीर केले. आज (दि. ३)या अनुदानासाठी अर्ज करण्याची शेवटची मुदत आहे.
...
बाजार समितीतील कांदा दर
उमराणा : सरासरी ५०० ते ६०० रु.
लासलगाव : सरासरी ७०१ रु.
पिंपळगाव : सरासरी ७११ रु.