अलायन्स एअर देणार नाशिकला विमानसेवा

म. टा. वृत्तसेवा, पंचवटी

नाशिक-मुंबई विमानसेवा सुरू करावी ही अनेक दिवसांपासूनची उद्योजकांची मागणी पूर्ण होण्याची चिन्हे आहेत. नाशिक इंडस्ट्र‌िज मॅन्यूफॅक्चरिंग असोसिएशन अर्थात निमा या संघटनेने भारतीय विमान प्राधिकरणाला २१ मार्च रोजी पाठविलेल्या पत्राला दोन दिवसात ई-मेलव्दारे उत्तर प्राप्त झाले आहे. त्यानुसार एअर इंडियाचे अध्यक्ष अनिल मेहता यांनी विमान सेवा सुरू करण्याबाबत सकारात्मकता दर्शविली आहे.

नाशिक विमानतळ पूर्ण झाले तरी त्याव्दारे नाशिक-मुंबईसह अन्य विमानसेवा अद्याप सुरू झालेल्या नाही. मध्यंतरी ज्येष्ठ उद्योजक रतन टाटा नाशिकमध्ये आल्यानंतर उद्योजकांनी त्यांच्याकडे ही खंत मांडली होती. त्यावर काही वेळ चर्चा झाली होती. उद्योजक त्याशिवाय सातत्याने शासनाकडे विमानसेवा सुरू करण्याबाबत प्राधिकरणाकडे देखील निमा संघटनेने २१ मार्च रोजी पत्र पाठविले होते. या पत्राची दखल घेत एअर इंडियाचे अध्यक्ष अनिल मेहता यांनी २३मार्च रोजी ई मेलव्दारे पत्र पाठवत सकारात्मकता दर्शविली आहे. अलायन्स एअर या पूर्णपणे एअरइंड‌िया लिमिटेड कंपनीच्या मालकीच्या असलेल्या विमानसेवेव्दारे आम्ही नाशिक-मुंबई विमानसेवा देण्यास तयार आहेत. त्यासाठी नाशिक आणि मुंबई विमानतळावरील योग्य वेळ सुचवावी असेही त्यांनी म्हटले आहे. आता पुढील हालचाली अपेक्षित असून एअर इंडियाला सकारात्मक प्रतिसाद दिल्यास लवकरात लवकर ही विमानसेवा सुरू होणे शक्य आहे.

उद्योजकांना लाभ

नाशिक-मुंबई विमानसा सुरू झाल्यास त्याचा लाभ उद्योजकांसह विविध कंपन्यांतील अधिकारी, कर्मचारी यांनी होणार आहे. याशिवाय आर्थिक चक्रावरही त्याचा सकारात्मक परिणाम होईल, केवळ मुंबईच नव्हेतर नाशिक- पुणे, नाशिक-औरंगाबाद या सेवाही सुरू कराव्यात अशी अपेक्षा व्यक्त करण्यात येत आहे.