दौऱ्यावेळी अमित ठाकरेंना राज ठाकरेंचा व्हिडीओ कॉल; राजपुत्रानं मोबाईल उंचावला अन् मग...

मालेगाव: राज्याच्या राजकारणात सध्या ठाकरेंची नवी पिढी चर्चेत आहे. उद्धवपुत्र आदित्य आणि राजपुत्र अमित दोघेही प्रचंड सक्रिय झाले आहेत. एकनाथ शिंदे यांच्या बंडानंतर आदित्य ठाकरे महाराष्ट्र दौऱ्यावर आहेत. शिवसंवाद, निष्ठा यात्रेच्या माध्यमातून आदित्य पक्षाला नवसंजीवनी देण्याचा प्रयत्न करत आहेत. तर दुसऱ्या बाजूला अमित ठाकरेंनी पक्षाच्या पुनर्बांधणीचं काम हाती घेतलं आहे. त्यांनीही दौऱ्यांचा सपाटा लावला आहे.

मुंबई, कोकणपासून अमित ठाकरेंच्या दौऱ्याला सुरुवात झाली. सोमवारी अमित ठाकरे मालेगावात पोहोचले. त्यांच्या स्वागतासाठी मनसैनिक मोठ्या संख्येनं उपस्थित होते. कार्यकर्त्यांकडून होत असलेलं स्वागत स्वीकारत असताना अमित यांना राज ठाकरेंचा व्हिडीओ कॉल आला. अमित यांना आलेल्या कॉलचा व्हिडीओ मनसेनं ट्विटर हँडलवरून शेअर केला आहे.

मनविसेचे अध्यक्ष अमित ठाकरे यांचे मालेगावमध्ये महाराष्ट्र सैनिकांनी अभूतपूर्व स्वागत केले. योगायोगाने त्याच वेळी राज ठाकरे यांचा अमितजींना मोबाईलवर व्हिडिओ कॉल आला. अमितजींनी तिथे जमलेल्या महाराष्ट्र सैनिकांची राजसाहेबांशी अनोख्या पद्धतीने भेट घडवून आणली, असं मनसेनं ट्विटमध्ये म्हटलं आहे. राज यांना व्हिडीओ कॉलवर पाहताच कार्यकर्त्यांनी जोरदार घोषणाबाजी सुरू केले. राज यांचं दर्शन घडताच कार्यकर्त्यांमध्ये उत्साह संचारलेला दिसला.

'व्हिडिओ कॉलवर प्रत्यक्ष राजसाहेब आहेत हे बघून महाराष्ट्र सैनिकांच्या जल्लोषाला एकच उधाण आले. अनपेक्षितपणे आपल्या विठ्ठलाचं 'व्हिडिओ-दर्शन' झाल्यामुळे अनेकजण अक्षरशः शहारून गेले आणि मग सर्वांनीच "हिंदूजननायक श्री. राजसाहेब ठाकरे यांचा विजय असो" आदी घोषणा देत मालेगाव दणाणून सोडले,' असं मनसेनं आणखी एका ट्विटमध्ये म्हटलं आहे.