बाजार समितीवर वर्णीसाठी चुरस; भाजपाची आघाडी, शिंदे गटात नाराजीची चिन्हे

पंचवटी : नाशिक कृषी उत्पन्न बाजार समितीवर भाजपच्याच पदाधिकाऱ्यांच्या नियुक्तीच्या हालचाली होत असल्याने या निवडींवरून नाशिकमध्ये शिंदे गटात नाराजी वाढण्याची शक्यता निर्माण झाली आहे.

राज्यात सत्तांतरानंतर मंत्रिमंडळ स्थापन झाल्यावर भाजप व शिंदे गटाने (बाळासाहेबांची शिवसेना) आपापले पदाधिकारी व कार्यकर्त्यांना खूश करण्यासाठी विविध मंडळांवर लक्ष केंद्रित केले आहे. त्याचाच एक भाग म्हणून राज्यातील कृषी उत्पन्न बाजार समित्यांच्या अशासकीय प्रशासक मंडळांवर वर्णी लावण्यासाठी दोन्ही गटांच्या हालचाली गतिमान झाल्या आहेत. मात्र, नाशिकमध्ये भाजपने आघाडी घेतल्याचे चित्र आहे. नाशिक कृषी उत्पन्न बाजार समितीच्या अशासकीय प्रशासक मंडळ निवडीबाबत भाजपचे जिल्हाध्यक्ष केदा आहेर आणि शहराध्यक्ष गिरीश पालवे यांनी उपमुख्यमंत्री देवेंद्र फडणवीस यांना मागील महिन्यात पत्र दिले होते. त्यात त्यांनी बाजार समितीच्या अशासकीय प्रशासक मंडळावर नेमणुकीसाठी भाजपच्या चार पदाधिकाऱ्यांची नावे सुचविली होती. त्या अनुषंगाने जिल्हा उपनिबंधकांनी तालुका उपनिबंधकांकडे पत्रव्यवहार करीत अहवाल सादर करण्याचे आदेश केले होते, तो अहवाल नुकताच सादर करण्यात आला आहे. त्यामुळे लवकरच या सदस्यांच्या नेमणुकीची घोषणा होण्याची शक्यता आहे. मात्र, त्यात शिंदे गटाला स्थान नसल्याने साहजिकच नाराजीनाट्य रंगण्याची चिन्हे आहेत. अशासकीय सदस्यपदी नियुक्तीसाठी केवळ भाजपमध्येच पात्र व्यक्ती आहेत का, शिंदे गटात यासाठी पात्र व्यक्ती नाहीत का, असे सवाल उपस्थित होऊ लागले आहेत. तूर्तास दबक्या आवाजात विचारले जाणारे हे प्रश्न प्रत्यक्षात सदस्य नेमणुकीनंतर मात्र चढ्या आवाजात उपस्थित केले जाऊ शकतात आणि त्यानंतर दोन्ही गटांमध्ये 'राजकारण' वाढण्याची शक्यता व्यक्त केली जात आहे.

मतदारांमध्ये संभ्रमावस्था

एकीकडे बाजार समिती निवडणुकीसाठी हालचाली सुरू असून, सोमवारी त्यासाठीची प्रारूप मतदारयादीदेखील प्रसिद्ध झाली आहे. मात्र, अशातच दुसरीकडे अशासकीय प्रशासक मंडळ नियुक्तीच्या हालचाली होत असल्याने मतदारांमध्ये संभ्रमावस्था निर्माण झाली आहे.