- गोळीबारात एकाचा मृत्यू, दोन जखमी
- भरदिवसा दरोडेखोरांचा धुमाकूळ
म. टा. खास प्रतिनिधी, नाशिक
उंटवाडीरोडवरील मुत्थूट फायनान्सच्या कार्यालयात शुक्रवारी सकाळी ११ वाजेच्या सुमारास सशस्त्र दरोडेखोरांनी धुमाकूळ घातला. सोने लुटण्याचा प्रयत्न अयशस्वी होत असल्याचे लक्षात येताच दरोडेखोरांनी एका युवा कर्मचाऱ्यावर बंदुकीतून तीन फैरी झाडून त्याची हत्या केली. घटनास्थळावरून फरार झालेल्या आरोपींचा शहर पोलिसांनी लागलीच शोध सुरू केला. दिवसाढवळ्या गोळीबार आणि लुटीच्या घटनेने शहरात एकच खळबळ उडाली असून, सुरक्षेचा मुद्दा ऐरणीवर आला आहे.
या घटनेत मुरियाईकिरा सजू सॅम्युअल (२९, रा. मुंबई, मूळ केरळ) या कर्मचाऱ्याची दरोडेखोरांनी हत्या केली. तर, या कार्यालयाचे मॅनेजर चंद्रशेखर भास्कर देशपांडे (६४, इंदिरानगर) आणि कैलास जयन (२८, मुंबई) हे दरोडेखोरांच्या हल्ल्यात गंभीर जखमी झाले. उंटवाडीरोडवरील म्हसोबा पुलाजवळ असलेल्या मधुरा टॉवर्स या इमारतीतील पहिल्या मजल्यावर मुत्थूट फायनान्सचे गाळा क्रमांक १० आणि ११ मध्ये कार्यालय आहे. कार्यालय नेहमीप्रमाणे सकाळी साडेनऊच्या सुमारास सुरू झाले. कर्मचाऱ्यांसह काही ग्राहकांची लगबग होती. सकाळी ११ ते सव्वाअकराच्या सुमारास चार जणांनी कार्यालयात प्रवेश केला. यातील तिघांकडे तीन बंदुका आणि एकाकडे कुऱ्हाड होती. या शस्त्रांच्या आधारे धमकावत त्यांनी कार्यालयातील कर्मचारी व ग्राहक अशा आठ जणांना एका बाजूला करीत त्यांचे मोबाइल गोळा करण्यास सुरुवात केली. यात काही महिला कर्मचारी व ग्राहकांचा देखील समावेश होता. आरोपींनी सोने ठेवण्यात आलेल्या तिजोरीच्या चावीची मागणी करीत सर्वांवर नियंत्रण मिळविले. त्याचवेळी सॅम्युअल यांनी सुरक्षा अलार्मचे बटण दाबले. यामुळे सायरन वाजू लागला. सुरक्षा यंत्रणा सतर्क होईल हे लक्षात येताच तिघा दरोडेखोरांनी आपल्याकडील बंदुकांमधून प्रत्येकी एक गोळी सॅम्युअलच्या दिशेने झाडली. अगदीच जवळून गोळ्या घुसल्याने सॅम्युअल जागीच गतप्राण झाले. यावेळी शाखा व्यवस्थापकाच्या डोक्यातही एकाने बंदुकीचा दस्ता मारला. कैलास जयन यांच्यावरही हल्ला केला. या दोघांच्या डोक्याला दुखापत झाली. यामुळे उपस्थितांचा थरकाप झाला. या गोंधळताच चारही दरोडेखोर घाईने खाली उतरले. त्यांचे दोन साथीदार इमारतीच्या खाली पल्सर दुचाकीवर तयारच होते. ट्रिपलसीट बसून ते सिटी सेंटर मॉल सिग्नलच्या दिशेने गेले. या घटनेची माहिती मिळताच पोलिस आयुक्त विश्वास नांगरे पाटील यांच्यासह सर्व वरिष्ठ पोलिस अधिकाऱ्यांनी घटनास्थळी धाव घेतली. श्वान पथकानेही माग काढण्याचा प्रयत्न केला. फॉरेन्सिक पथक, क्राइम ब्रँचसह इतर शोध पथकांनी पुरावे संकलित करीत आरोपींचा माग काढण्याचा प्रयत्त्न सुरू केल्याचे पोलिसांनी सांगितले. दरम्यान, या घटनेत दरोडेखोरांच्या हाती काही मुद्देमाल लागला नसल्याचा दावा पोलिसांनी केला आहे.
घटनेच्या तपासाच्या अनुषंगाने पोलिसांनी काम सुरू केले आहे. वेगवेगळी पथके त्यासाठी कार्यरत आहेत. दरोडेखोरांच्या गोळीबारात एका कर्मचाऱ्याचा मृत्यू झाला आहे. प्राथमिक तपासात दरोडेखोरांनी सोने लुटल्याचे समोर आलेले नाही.
- विश्वास नांगरे पाटील, पोलिस आयुक्त