बंदुकांची तस्करी; तिघे जेरबंद

एटीएसकडून पिंपळगाव टोल नाक्यावर कारवाई

म. टा. प्रतिनिधी, नाशिक

परराज्यातून बंदुकांची तस्करी करणाऱ्या दोघांना तसेच, या बंदुकांची मागणी करणाऱ्या खरेदीदारास नाशिक दहशतवादविरोधी पथकाने शुक्रवारी मध्यरात्रीच्या सुमारास अटक केली. एटीएसच्या पथकाने पिंपळगाव बसवंत टोलनाक्यावर सापळा रचून त्यांना ताब्यात घेतले.

अभिदत्ता खंडेराव पाटील (वय २३), हितेश रतन देवरे (वय २४) दोघे रा. सिडको, नाशिक आणि पंकज गायकवाड (रा. नाशिकरोड, नाशिक) अशी तिघा संशयितांची नावे आहेत. एका राज्यातून दुसऱ्या राज्यात शस्त्रांचा साठा येत असल्याची माहिती नाशिक एटीएस पथकाला मिळाली होती. संशयित आरोपींनी धुळे सोडल्यानंतर माहिती मिळाल्याने नाशिक एटीएसने शुक्रवारी रात्री पिंपळगाव बसवंत येथील टोलनाक्यावर सापळा रचला. रात्री १२ ते एक वाजेदरम्यान एटीएस पथकाने काही संशयित दुचाकीचालकांची तपासणी केली. मात्र, फारसे काही हाती लागले नाही.

रात्री एक वाजेच्या दरम्यान टोलनाक्यावर आलेल्या पाटील व देवरे यांची दुचाकी थांबवून एटीएसच्या पथकाने तपासणी केली असता, त्यांना तीन देशी बनावटीच्या बंदुका तसेच, आठ जिवंत काडतुसे सापडून आली. पोलिसांनी लागलीच चौकशीसाठी त्यांना ताब्यात घेतले. शनिवारी पहाटेपर्यंत चाललेल्या चौकशीत हा शस्त्रसाठा नाशिकरोड येथे राहणाऱ्या पंकज गायकवाडला सोपविण्यात येणार असल्याचे निष्पन्न झाले. सकाळी साडेदहा ते ११ वाजेच्या सुमारास एटीएसच्या पथकाने त्यालाही नाशिकरोड येथे सापळा रचून अटक केली. या तिघांविरोधात मुंबईतील काळाचौकी पोलिस स्टेशनमध्ये आर्म्स अॅक्टनुसार गुन्हा दाखल करण्यात आला आहे. संशयितांना कोर्टासमोर हजर करण्यात आले असता, त्यांना २० ऑक्टोबरपर्यंत पोलिस कोठडी सुनावण्यात आली.

तस्करी कनेक्शन शोधणार

परराज्यातील हत्यार तस्करीचे कनेक्शन शोधून काढण्याचा प्रयत्न केला जाईल. अनेकदा मध्य प्रदेश राज्यातील सैंधवा परिसरातून गावठी कट्टे नाशिकसह इतर ठिकाणी दाखल होतात. त्यामुळे घातपाताच्या दृष्टिकोनातून सदर घटनेचा तपास करण्यात येणार असल्याचे पोलिस सूत्रांनी स्पष्ट केले.