म. टा. वृत्तसेवा, देवळाली कॅम्प
येथील बार्न्स स्कूल परिसरात ट्रॅव्हल्स बुकिंगचे काम करणाऱ्या शाहीद अली हसन शेख (वय ३३) या युवकावर अत्तर शेख नामक ट्रॅव्हल्स एजंटने वार करीत गंभीर जखमी केले. या प्रकरणी देवळाली कॅम्प पोलिसात भा.द.वि कलम ३०७ व महाराष्ट्र पोलिस कायदा १३५ प्रमाणे जीवे मारण्याचा प्रयत्न केला म्हणून गुन्हा दाखल करण्यात आला आहे.
फिर्यादी शाहीद हा ट्रॅव्हल्स एजंट असून, नागरिकांना परदेशात जाण्यासाठी विमानाची तिकिटे व पासपोर्टचे काम करीत असल्याने त्याच्याजवळील आठ लाख रुपये त्याने तिकिटाच्या कामासाठी दिले. मात्र पाथर्डी येथील झेड झोन परिसरात राहणाऱ्या संशयित आरोपी अत्तर शेख याने वारंवार मागणी करूनही बुकिंगचे पैसे परत केले नाही. बुधवारी (दि. ६) सायंकाळी सव्वासात वाजता फिर्यादी हे देवळालीच्या जॉली प्लाझा परिसरातील नवजीवन हॉस्पिटलमध्ये आपल्या पत्नीला भेटण्यासाठी गेले असता, अत्तर शेख याने पाठीमागून येऊन शाहीदवर धारधार शस्त्राने वार करून गंभीर दुखापत करीत जीवे मारण्याचा प्रयत्न केला. यानंतर घटनस्थाळावरून पळ काढला. दरम्यान, जखमी शाहीदला नागरिकांनी उपचारासाठी तत्काळ खासगी रुग्णालयात दाखल केले. या प्रकरणी पोलिस निरीक्षक देवीदास वांजळे यांच्या मार्गदर्शनाखाली अधिक तपास सुरू आहे.