बजरंग दल नेत्यावर प्राणघातक हल्ला

मटा ऑनलाइन वृत्त । मालेगाव

विश्व हिंदू परिषदेचे मालेगाव जिल्हा महामंत्री तथा बजरंग दलाचे कार्यकर्ते मच्छिंद्र शिर्के यांच्यावर नानावटी पेट्रोल पम्पाजवळ मोटार सायकलवरून आलेल्या २५ ते ३० अज्ञात हल्लेखोरांनी प्राणघातक हल्ला केला असून यात शिर्के गंभीररित्या जखमी झाले आहेत. शिर्के यांना जवळच्या खासगी रुग्णालयात दाखल करण्यात आलं आहे.

शिर्के यांच्यावर हल्ला झाल्यानंतर त्यांच्या समर्थकांनी हल्ला झालेल्या ठिकाणी आणि मोसम पूल चौकात रास्ता रोको करून संताप व्यक्त केला. मालेगावचे अप्पर पोलीस अधीक्षक राकेश ओला, गजानन राजमाने यांनी कार्यकर्त्यांची समजूत घालून शांततेच आवाहन केले आहे. शिर्के यांच्यावर हल्ला करणाऱ्यांना त्वरित अटक करावी अशी मागणी मालेगावी होत आहे.

हल्लेखोर पसार झाले त्या मार्गावरील अनेक ठिकाणच्या सी.सी.टी व्ही फुटेजमध्ये हल्लेखोर स्पष्टपणे दिसत असल्याच्या क्लिप्स जलद गतीनं व्हायरल झाल्या आहेत. सी.सी.टी.व्ही फुटेजच्या आधारे हल्लेखोरांचा शोध घेण्याचा आव्हान पोलिसांपुढे आहे.

दरम्यान, शहराच्या पश्चिम भागात तणावपूर्ण शांतता असून पोलीस प्रशासन शांतता कायम राखण्यासाठी कसोशीने प्रयत्न करीत आहे. छावणी पोलिसांत याप्रकरणी गुन्हा नोंदणीचे काम सुरू आहे.