भावली, कडवा धरणे भरणार

इगतपुरी तालुक्यात सरासरीच्या ५० टक्के पाऊस

म. टा. वृत्तसेवा, घोटी

इगतपुरी तालुक्यात गेल्या चार ते पाच दिवसांपासून सुरू असलेल्या मुसळधार पावसामुळे दारणा धरणातून मोठ्या प्रमाणात विसर्ग सुरू आहे. तर भावली व कडवा ही धरणे भरण्याच्या मार्गावर आहेत. दरम्यान, सततच्या पावसामुळे या तालुक्यात रविवारअखेर एकूण सरासरीच्या ५० टक्के पाऊस झाल्याची माहिती आकडेवारी वरुण स्पष्ट होते.

जिल्ह्यात सर्वाधिक पाऊस या तालुक्यात होत असल्याने या तालुक्यातून मोठ्या प्रमाणात पाण्याचा विसर्ग मराठवाडा या परिसराकडे अर्थात जायकवाडीकडे करण्यात येत आहे. गेल्या पाच दिवसांपासून हजारो क्युसेस पाणी दारणा धरणातून विसर्ग होत आहे. दारणा धरणात भाम, वाकी, भावली या नद्यांचे पाणी मोठ्या प्रमाणात संचित होत असल्याने आजमितीस ७६ टक्के साठवण करून उर्वरित पाणी प्रशासनाच्या आदेशानुसार विसर्ग करण्यात येत आहे.

या तालुक्यातील दारणा धरणाबरोबरच भावली, कडवा, वैतरणा ही धरणे भरण्याच्या मार्गावर आहेत. तर मुकणे धरणातही समाधानकारक साठा निर्माण झाला आहे. येत्या एक-दोन दिवसांत भावली धरण ओव्हरफ्लो होण्याची शक्यता आहे. इगतपुरी तालुक्यात पाऊस गेल्या चार दिवसांपासून शंभर मिलीमीटरांवर आकडे गाठत असून, रविवारीही चोवीस तासात ९८ मिलीमीटर पावसाची नोंद झाली आहे. तालुक्यात एकूण १७१७ मिलीमीटर पाऊस झाला आहे.

शेतीकामाला सुरुवात

दिंडोरी : दिंडोरी परिसरात गेल्या तीन दिवसांपासून पाऊस सुरूच असून धरणसाठ्यात वाढ झाली आहे. पश्चिम भागात भाताची अावणी तर पूर्व भागात टोमॅटोसह इतर भाजीपाल्याच्या लागवड सुरू आहे. भात, नागली, वरई या पिकांना जीवदान मिळाले आहे.