मनमाडमध्ये आजपासून भीमोत्सोवाचा गजर

म. टा. वृत्तसेवा, मनमाड

भारतरत्न बाबासाहेब आंबेडकर जयंती व महात्मा फुले जयंती निमित्ताने शहरात भीमोत्सव २०१७ चे अभिनवरित्या आयोजन करण्यात आले असून, भीमोत्सवात प्रबोधनाचा जागर करण्यात येणार आहे. शहरात प्रथमच भीमोत्सवात एकपात्री प्रयोग, शाहिरी, जलसा, बोधप्रद व्याख्याने आणि भीमाच्या लेकींचा कलाविष्कार, मॅरेथॉनसह विविध स्पर्धांचा भरगच्च कार्यक्रम होत आहे.

११ ते १८ एप्रिल दरम्यान होणारा हा भिमोत्सव नाविन्यपूर्ण आणि प्रबोधनात्मक होईल अशी चिन्हे आहेत. ११ एप्रिल रोजी धावपटू कविता राऊत यांच्या प्रमुख उपस्थितीत मिनी मॅरेथॉन स्पर्धा होणार आहे. मालेगाव चौफुली येथून ही स्पर्धा सुरू होईल. सायंकाळी एकात्मता चौक येथे ‘मी ज्योतिबा बोलतोय’ हा एकपात्री प्रयोग कुमार आहेर सादर करतील. १२ एप्रिल रोजी गायक सुनील खरे यांची ‘प्रबोधनात्मक रजनी’, १३ एप्रिलला डॉ. बाबासाहेब आंबेडकर पुतळा परिसरात स्वच्छता मोहीम, महू येथे जाण्यासाठी रॅलीचे आयोजन करण्यात आले आहे. भीमोत्सवाचे खास वैशिष्ट्य म्हणजे शहरातील भीमाच्या लेकींचा कलाविष्कार असून १२६ मुली व स्त्रिया डॉ. आंबेडकरांना मानवंदना देतील. रात्री फटाक्यांची आतषबाजी करण्यात येणार आहे. १४ एप्रिलला रांगोळी स्पर्धा व अभिवादन कार्यक्रम होणार आहे. डॉ आंबेडकरांचे विचार सर्वदूर पोहचावेत यासाठी जाणीवपूर्वक भिमोत्सवात अॅड. वैशाली डोळस यांचे १५ एप्रिल रोजी तर दैनिक सकाळचे संपादक श्रीमंत माने यांचे व्याख्यान एकात्मता चौकात आयोजित करण्यात आले आहे. याशिवाय वक्तृत्व रांगोळी स्पर्धा शाहीर राजेंद्र कांबळे यांचा शाहिरी जलसा व राहुल अनवीकर यांचे ‘गीत भीमाचे लाइव्ह कॉन्सर्ट’ आदी कार्यक्रम होतील, असे अध्यक्ष दिलीप नरवडे, माजी नगराध्यक्ष राजाभाऊ पगारे यांनी कळविले आहे.