jitendra.tarte@timesgroup.com
Twitter : jitendratarte@MT
नाशिक : शहरात मोक्याच्या ठिकाणी स्वमालकीची तब्बल पाच एकर जागा उपलब्ध असतानाही भाडेतत्त्वावरील इमारतीत होणारी एसएससी आणि एचएससी बोर्डाच्या विभागीय कार्यालयांची वणवण आता थांबणार आहे. या जागेची निविदा मुंबईतील एका विख्यात बांधकाम कंपनीस देण्यात आली असून, प्रत्यक्ष कामास सुरुवातही झाली आहे. कार्यालयासाठी बोर्डाच्या ताब्यात जागा आल्यानंतर तब्बल १८ वर्षांनंतर बांधकामास मुहूर्त लागला आहे. दरम्यानच्या काळात कार्यालयाच्या भाडेतत्त्वावरील जागेपोटी कोट्यवधीची किंमत मोजली गेली आहे.
'सरकारी काम अन् थोडे थांब' याचाही प्रत्यय विविध सरकारी कार्यालयांमध्ये नागरिकांना वेळोवेळी येतो. मात्र, या अनुभवास सरकारी कार्यालयही अपवाद नाही, याचेच उदाहरण बोर्डाची नाशिक विभागाची वास्तू बनली आहे. आडगाव परिसरातील मोक्याच्या ५ एकर जागेवर बोर्डाची नवी इमारत साकारण्यास आता कुठे सुरुवात झाली आहे. या जागेस तीन बाजूने संरक्षक भिंत असली तरीही एक बाजू पूर्णपणे मोकळी होती. याचा फायदा घेत या जागेवर परिसरातील नागरीकांनी अतिक्रमण केले होते. हे अतिक्रमण नुकतेच हटविण्यात आले. येथे प्रत्यक्षात बांधकामासही दोनच दिवसांपूर्वी सुरुवात झाली आहे. या कामासाठी सुमारे २३ कोटी ७० लाखांवर खर्च अपेक्षित आहे. साधारण वर्षभरात ही इमारत उभी राहणे अपेक्षित आहे. 'देर से आये, दुरुस्त आये...' अशी एक म्हण आहे. पण बोर्डाच्या प्रलंबित कारभारास ती पूर्णत: लागू होत नाही. 'देरसे आये, हे विधान चपखल बसत असले तरीही दुरुस्त आये असे म्हणज उचित ठरणार नाही. कारण, बोर्डाचे कार्यालय १९९६ पासून भाडेतत्त्वावरील इमारतीत चालविले जाते. सद्यस्थितीत या इमारतीत दरमहा सुमारे पावणेपाच लाख रुपयांचे भाडे बोर्डाला जागामालकास द्यावे लागतात. आजवरचा हिशेब केल्यास ही रक्कम काही कोटींच्या घरात जाते. इतक्या पैशांमध्ये इतक्या कालावधीत बोर्डाने टोलेजंग इमारत कधीच साकारली असती. 'बोर्डाला छपराची प्रतीक्षा' या मथळ्याखाली 'मटा'ने या विषयाची दखल २ ऑगस्ट २०१६ रोजी घेतली होती.
सध्याचे कार्यालय अपुरे
राज्याच्या माध्यमिक व उच्च माध्यमिक शिक्षण मंडळाचे नाशिक विभागीय कार्यालय अनेक वर्षांपासून मुंबई नाक्यावरील वाणी हाउस येथे कार्यरत आहे. नाशिकसह जळगाव, धुळे व नंदुरबार या जिल्ह्यांचा कार्यभार या कार्यालयाच्या माथ्यावर आहे. सुमारे १०० कर्मचाऱ्यांचा गाडा ओढणाऱ्या या कार्यालयास सध्या जागा अपूर्ण पडण्यासोबतच जागेचे भाडे वाढविण्याचे भय आजवर कायम सतावत आले. यामुळे विभागीय कार्यालयाने नव्या इमारतीचा शोधही इतरत्र सुरू केला होता. पण, त्यांना द्वारका परिसरात ३० ते ३५ हजार स्क्वेअर फुटांची अपेक्षित इमारत मिळू शकलेली नाही.
एसएससी व एचएससी बोर्डाच्या विभागीय कार्यालयाच्या नव्या इमारतीचे बांधकाम सुरू झाले आहे. तेथील जागेवरील अतिक्रमण हटविण्यात आले आहे. आगामी वर्षभराच्या काळात विभागीय कार्यालयास अधिकारी कक्ष, अतिथी निवास, स्ट्राँग रूमसह प्राथमिक सुविधांनी सज्ज अशी इमारत साकारली जाईल, असे नियोजन आहे. साधारणत: २३ कोटी ७० लाखांवर खर्च यासाठी अपेक्षित आहे.
-राजेंद्र मारवाडी, सचिव, विभागीय शिक्षण मंडळ, नाशिक