म. टा. खास प्रतिनिधी, नाशिक
शहरात चेन स्नॅचर्स पुन्हा सक्रिय झाले आहेत. विशेषत: लॉन्स परिसरात सातत्याने महिलांना टार्गेट केले जात आहे. मागील काही दिवसांत सातत्याने होणाऱ्या चेन स्नॅचिंगच्या घटनांमध्ये चोरटे कधी दुचाकीवरून आले, तर कधी चारचाकी वाहनांतून!
सध्या लग्नसराईचा मोसम सुरू असून, दूरवर असलेले पार्किंग, पुरेशा प्रकाशाचा अभाव आणि सीसीटीव्ही, तसेच सिक्युरिटी गार्डचा असलेला अभाव चोरट्यांच्या पथ्यावर पडत असल्याचा दावा पोलिसांनी केला आहे. शहरात काही महिन्यांपासून सातत्याने चेन स्नॅचिंगच्या घटना घडत आहेत. पोलिसांनी मध्यंतरी दोघांना अटक केल्याने तब्बल दहा गुन्ह्यांचा उलगडादेखील झाला होता. त्यानंतर काही दिवसांच्या शांततेनंतर चेन स्नॅचिंगच्या गुन्ह्यांनी पुन्हा वेग पकडला आहे. विशेषत: लग्न समारंभांकडे चोरट्यांचा डोळा असल्याचे दिसते. मागील दोन ते तीन दिवसांपासून दररोज चेन स्नॅचिंग झाल्याची नोंद असून, यातील एका घटनेत आरोपीने पळून जाण्यासाठी चारचाकी वाहनाचा वापर केला आहे. दुचाकीवरून थेट चारचाकी वाहनाचा वापर घटनास्थळी झाल्याने या गुन्ह्यात स्थानिक आरोपींचा सहभाग असण्याची शक्यता वर्तविली जात आहे.
--
घटना क्रमांक एक : आडगाव पोलिस ठाणे
घटनास्थळ : साईलीला लॉन्ससमोर, औरंगाबादरोड, दि. १ फेब्रुवारी, वेळ : रात्री ९
पाथर्डी फाटा भागातील दामोदरनगर येथे राहणाऱ्या सरस्वती रामचंद्रन नायर (वय ६०) या लग्न समारंभासाठी लॉन्समध्ये गेल्या होत्या. विवाह सोहळा आटोपल्यानंतर लॉन्ससमोर पायी जाणाऱ्या नायर यांच्या गळ्यातील ३२ ग्रॅम वजनाची आणि ४० हजार रुपये किमतीची सोन्याची पोत चोरट्यांनी ओरबाडून नेली. या घटनेत स्नॅचर्स दुचाकीवरून नायर यांच्या पाठीमागील बाजूने आले होते.
--
घटना क्रमांक दोन : आडगाव पोलिस ठाणे
घटनास्थळ : संजीवनी लॉन्स, औरंगाबादरोड, दि. ३० जानेवारी, वेळ : रात्री १०
काळ्या रांगाचा जॅकेट घातलेला आरोपी फिर्यादी चंद्रकला बाळकृष्ण नागरे (५०, रा. साईनगर, अमृतधाम) यांच्या दिशेने चालत आला. फोनवर बोलण्याचे नाटक करणाऱ्या चोरट्याने नागरे यांच्या गळ्यातील ३० हजार रुपये किमतीचे चार तोळ्यांचे मंगळसूत्र तोडून पोबारा केला. त्यानंतर आरोपी चारचाकी वाहनात बसून जत्रा हॉटेलच्या दिशेने पसार झाला. आडगाव पोलिस ठाण्यात गुन्ह्याची नोंद करण्यात आली.
--
घटना क्रमांक तीन : अंबड पोलिस ठाणे
घटनास्थळ : औदुंबर चौक, मोगलनगर, सिडको, दि. ३१ जानेवारी, वेळ : दुपारी २.५०
यातील फिर्यादी प्रीती समीर गागरे (३५, रा. पारिजातनगर) या दुचाकीवरून घरी परततत असताना चोरट्यांनी संधी साधली. काळ्या रंगाच्या दुचाकीवरून आलेल्या चोरट्यांनी गागरे यांच्या गळ्यातील ४२ हजार रुपये किमतीची आणि १९ ग्रॅम वजनाची सोन्याची पोत तोडून धूम ठोकली.
--
लॉन्सचे दुखणे कायम
याबाबत बोलताना पोलिस उपायुक्त अमोल तांबे यांनी सांगितले, की सध्या लॉन्स परिसरात चेन स्नॅचिंगच्या घटना होत आहेत. या पार्श्वभूमीवर नुकतीच लॉन्सचालकांची बैठकसुद्धा घेण्यात आली. लॉन्सला सुरक्षित पार्किंग नसल्यास विवाहासाठी येणाऱ्या महिलांना पायी चालत लॉन्सपर्यंत जावे लागते. अनेकदा लॉन्सबाहेर पुरेशी प्रकाशव्यवस्था दिसून येत नाही, तसेच सिक्युरिटी गार्ड्स आणि सीसीटीव्हीसुद्धा नसतात. अशा सर्व परिस्थितीचा चोरट्यांना फायदा मिळतो. या अनुषंगाने बहुतांश लॉन्सचालकांना नोटिसादेखील बजावण्यात आल्या आहेत. आमची गस्त प्रणाली व्यवस्थित असून, लवकरच विवाह तारखांच्या दृष्टीने गस्तीच्या नियोजनात बदल करण्यात येईल. सध्या चोरट्यांची मोडस ऑपरेंडी वेगवेगळी असून, त्यांच्या अटकेनंतरच ते स्थानिक आहेत की बाहेरचे याचा खुलासा होऊ शकेल. आजमितीस सर्वच घटनांचा तपास सुरू असल्याचेही तांबे यांनी स्पष्ट केले.
--
चेन स्नॅचिंग टाळण्यासाठी...
--
-विवाह समारंभाला जाताना शक्यतो दागिन्यांचा वापर करू नये
-लॉन्स ते पार्किंग हे अंतर महिलांनी शक्यतो एकटे चालू नये
-वृद्ध महिलांना चोरटे सहजतेने टार्गेट करतात, वृद्धांना एकटे सोडू नये
-वऱ्हाडी मंडळींनी शक्यतो ग्रुपमध्ये राहावे
-आपल्या आजूबाजूच्या संशयास्पद व्यक्तींच्या हालचाली टिपाव्यात