सुटीतही फुलपाखरू उद्यानातील लेझर शो बंद

म. टा. वृत्तसेवा, इंदिरानगर

पांडवलेण्याच्या मागील बाजूस असलेल्या वनविभागाच्या जागेत उभारलेल्या फुलपाखरू उद्यानातील लेझर शो बंदच झाला असून, तो पुन्हा कार्यरत करण्यात येणार असल्याचे वनविभागाकडून सांगण्यात आले आहे. मात्र, ऐन दिवाळीच्या सुट्टीत हा लेझर शो बंद असल्याने नागरिकांचा हिरमोड झाला आहे. वारंवार अशा पद्धतीने हा शो बंद करण्यात येऊ नये, अशी अपेक्षा नागरिकांनी व्यक्‍त केली आहे.

पांडवलेण्याच्या मागील बाजूस असलेल्या वनविभागाच्या जागेत फुलपाखरू उद्यान साकारण्यात आले आहे. संपूर्ण जंगलमय परिसर असलेल्या या भागाचा विकास करण्याच्या उद्देशाने हे गार्डन उभारण्यात आले असून, या उद्यानात शहरातील पहिला लेझर शो उभारण्यात आला आहे. पर्यावरण संरक्षणाचा संदेश या लेझर शोच्या माध्यमातून देण्यात येत आहे. हा शो सुरू झाल्यानंतर काही दिवसांनी बंद पडला होता. नंतर पुन्हा सुरू करण्यात आला होता. त्यानंतर पावसाळा सुरू झाल्याने हा शो पुन्हा बंद करण्यात आला आहे. पावसाळ्यामुळे बंद केलेला शो अद्याप सुरू न केल्याने नागरिकांनी नाराजी व्यक्‍त केली आहे. आजही अनेक नाशिककर किंवा अनेक पर्यटक या ठिकाणी लेझर शो पाहण्यासाठी जातात, पण त्यांची निराशा होते. ऐन दिवाळीत अशा पद्धतीने कोट्यवधी रुपये खर्च करून उभारलेल्या प्रकल्पाची अशी अवस्था होत असल्याने भविष्यात या प्रकल्पाचे काय होणार, असा प्रश्न उपस्थित होत आहे. निवडणुकीत धामधुमीत उद्‌घाटन करण्यात आलेल्या या शोचे आता नवनिर्माण होणार की नाही, असाही प्रश्न नागरिकांनी उपस्थित केला आहे. त्यामुळे आता हा शो पुन्हा सुरू होण्याकडे नागरिकांचे लक्ष लागले आहे.


पावसाळ्यामुळे हा लेझर शो बंद ठेवण्यात आला होता. पावसाळा संपल्यावर हा शो सुरू करण्यात आला होता. मात्र, मागील काही दिवसांपासून पुन्हा पाऊस सुरू झाल्याने तो पुन्हा बंद ठेवण्यात आला आहे. आता पावसाळा संपल्याने लवकरच तो सुरू करण्यात येईल.

- राहुल वाघ, वनरक्षक