म. टा. प्रतिनिधी, नाशिक
पीएफ स्लिप व आरटीई प्रमाणपत्र आठ दिवसात देण्यात येणार असून एकाकी पद, वेतनेतर अनुदान, संस्था अंतर्गत वाद हे सर्व प्रश्न ३० सप्टेंबरपर्यंत संपविण्यात येतील, असे आश्वासन रामचंद्र जाधव यांनी दिले. तसेच अनुकंप तत्वावरील मान्यता ३० सप्टेबरपर्यंत देणार असल्याचेही जाधव यांनी सांगितले आहे.
नाशिक भारत स्काऊट गाईड कार्यालय येथे मुख्याध्यापक, शिक्षक, लिपिक आदींची बैठक झाली. यावेळी रामचंद्र जाधव बोलत होते. शिक्षक, मुख्याध्यापक, पर्यवेक्षक, लिपिक यांचे प्रलंबित प्रश्नांबाबत यावेळी चर्चा करण्यात आली. माध्यमिक विभागाचे शिक्षणाधिकारी नितीन बच्छाव यांनी संच मान्यता दुरुस्ती, डीएड ते बीएड पदोन्नती, पर्यवेक्षक, उपमुख्याध्यापक, मुख्याध्यापक यांच्या पदोन्नती मान्यता, विना अनुदानितवरुन अनुदानितसाठी मान्यता आठ दिवसात देणार असल्याचे आश्वासन मुख्याध्यापक संघाला दिले.
गेल्या एक वर्षापासून नाशिक जिल्ह्यातील ७२ शिक्षक वेतनाच्या प्रतिक्षेत असून वेतनाची कागदपत्रेही पुणे येथे पडून आहेत. हा प्रश्न मुख्याध्यापक संघाने प्रकाशझोतात आणल्यानंतर सर्व कागदपत्रे ३० तारखेपर्यंत पूर्ण करण्याचे आश्वासन शिक्षण उपसंचालक रामचंद्र जाधव यांनी दिले. जुन्या पेन्शन योजनेबाबत वेतन अधिक्षक गणेश फुलसुंदर म्हणाले की, जुन्या पेन्शनचा निर्णय हा शासनाचा धोरणात्मक निर्णय असून या बाबत कोर्ट केस सुरू आहे. कोर्टाचे स्पष्ट आदेश आल्याशिवाय जुनी पेन्शन योजना लागू होऊ शकत नाही. डीसीपीएसधारकांचा सहाव्या वेतन आयोगाचा फरक सरकारची परवानगी घेऊन त्वरित कर्मचाऱ्यांच्या खात्यावर जमा करण्याचे आदेश उपसंचालकांनी यावेळी दिले. तसेच शिल्लक मेडिकल बिले त्वरित काढणार असल्याचेही शिक्षणाधिकारी बच्छाव यांनी यावेळी सांगितले. ३० सप्टेंबरपर्यंत एकही समस्या राहणार नाही, असे नितीन बच्छाव व रामचंद्र जाधव यांनी यावेळी सांगितले. यावेळी राजेश शिंदे, मुख्याध्यापक संघाचे मार्गदर्शक सुरेश शेलार, अध्यक्ष एस. के. सावंत, कार्याध्यक्ष शिवाजी शिरसाठ, सचिव एस. बी. देशमुख आदी उपस्थित होते.
... अन्यथा आंदोलन
मुख्याध्यापक संघाने आक्रमक पवित्रा घेत सर्व प्रश्न ३० सप्टेंबरपर्यंत मार्गी न लागल्यास मुख्याध्यापक संघ २ ऑक्टोबर, महात्मा गांधी जयंतीपासून गांधीगिरी पद्धतीने आंदोलन करेल, असा इशारा सचिव एस. बी. देशमुख यांनी दिला.