सॅल्यूट! २६व्या वर्षी कॅप्टन अभिलाषा बराकचा पराक्रम, पाहा प्रेरणादायी कहाणी

म. टा. प्रतिनिधी, नाशिक : चेन्नईच्या ऑफिसर्स ट्रेनिंग अकादमीतून लष्कराचे प्रशिक्षण पूर्ण करत असताना, केवळ 'ग्राऊंड ड्युटी'साठी पात्र असल्याचे माहीत असतानाही अभिलाषा बराक यांनी हवाई प्रशिक्षणाच्या रकानाही मार्क केला. त्या वेळी संरक्षण क्षेत्रात लढाऊ वैमानिक म्हणून महिलांना सामावून घेण्याची तरतूदच नव्हती. मात्र, हे क्षेत्र महिलांसाठीही खुले झाले आणि हरियाणातील रोहतक जिल्ह्याची ही कन्या नाशिकच्या आर्मी एव्हिएशनमध्ये हेलिकॉप्टरची लढाऊ वैमानिक म्हणून दाखल होत 'आकाशाला गवसणी' घालते आहे.

गांधीनगर येथे बुधवारी झालेल्या पदवीदान सोहळ्यात कॅप्टन अभिलाषा चर्चेचा विषय ठरल्या. वडील आणि भावाकडून सैन्य दलात येण्याची प्रेरणा घेणाऱ्या अभिलाषा यांनी आजवरच्या प्रवासात चमकदार कामगिरी केली आहे. रोहतकमध्ये (हरियाणा) त्यांचे बालपण गेले. त्यांचे वडीलही लष्करातून निवृत्त झाले आहेत. तर भाऊ सध्या लष्करात कार्यरत आहे. हिमाचल प्रदेशातील कासूली लॉरेन्स स्कूलच्या त्या विद्यार्थिनी आहेत. त्यांनी दिल्ली तंत्रज्ञान विद्यापीठातून इलेक्ट्रॉनिक्स आणि कम्युनिकेशन इंजिनीअरिंगमध्ये बी. टेक पदवी घेतली. २०१८ मध्ये अभिलाषा चेन्नईच्या ऑफिसर्स ट्रेनिंग अकादमीमधून लष्करात भरती झाल्या. या प्रशिक्षणादरम्यान त्यांना घोडेस्वारी आणि ज्युडोमध्ये मेरिट कार्ड मिळाले. यादरम्यान आर्मी एअर डिफेन्सच्या कॉर्प्समध्ये संलग्न असताना अभिलाषा यांची राष्ट्रपती रामनाथ कोविंद यांच्यासमोर होणाऱ्या 'एएडी' या प्रतिष्ठित हवाई सादरीकरणासाठी कमांडर म्हणून निवड झाली होती.

योगायोगाने मिळाली संधी

सन २०१८ मध्ये चेन्नईच्या ऑफिसर्स ट्रेनिंग अकादमीतून प्रशिक्षण पूर्ण केले. यानंतर त्यांनी आर्मी एव्हिएशन कोअरमध्ये निवड केली. फॉर्म भरताना त्यांना आपण स्वत: केवळ ग्राउंड ड्युटी रोलसाठी पात्र असल्याची जाणीव होती. मात्र, अर्जात त्यांनी हवाई उड्डाणासाठी अभ्यासक्रमांच्या पात्रतांवरही मोहोर उमटवून या विषयात स्वारस्य दर्शविले होते.

३७ अधिकारी देशसेवेत

गांधीनगर येथील कॉम्बॅट एव्हिएटर्स अभ्यासक्रमाचा दीक्षान्त सोहळा बुधवारी मान्यवरांच्या उपस्थितीत पार पडला. या सोहळ्यासाठी प्रमुख अतिथी म्हणून लष्करातील हवाई विभागाचे महासंचालक लेफ्टनंट जनरल अजयकुमार सुरी होते. या अभ्यासक्रमाद्वारे देशाच्या सेवेसाठी ३७ अधिकारी उपलब्ध झाले आहेत. या वेळी लष्कराच्या तुकड्यांनी प्रात्यक्षिके सादर केली. तसेच, अत्याधुनिक तंत्रज्ञानावर आधारित उच्च क्षमतेच्या हेलिकॉप्टरद्वारे सैनिकांनी हवाई प्रात्यक्षिकांचेही सादरीकरण करीत प्रेक्षकांची मने जिंकली.