बाहेर पडणाऱ्यांवर करडी नजर
म. टा. खास प्रतिनिधी, नाशिक
अचानक घरघर आवाज करीत आलेला ड्रोन, त्याद्वारे घराबाहेर न पडण्याच्या मिळणाऱ्या सुचना आणि ड्रोनद्वारे आपली छबी टिपली जाऊ नये यासाठी धडपड करणारे नागरिक असे चित्र शहराच्या काही भागात दिसून आले. ड्रोनद्वारे टिपण्यात येणाऱ्या नागरिकांच्या छबींच्या आधारे थेट गुन्हे सुद्धा दाखल करण्यात येणार आहे.
भद्रकाली, जुने नाशिक, सिडको यासारख्या दाट लोकसंख्या असलेल्या भागांमध्ये नागरिक मोठ्या प्रमाणावर रस्त्यावर येतात. पोलिसांच्या वाहनांची चाहुल लागताच नागरिक पटापट घरामध्ये बसतात. असे प्रकार रोखण्यासाठी पोलिसांनी ड्रोनची मदत घेतली आहे. यासाठी पोलिस प्रशासनाकडे दोन ड्रोन्स उपलब्ध असून, त्यावर पब्लिक अॅड्रेस सिस्टिम बसविण्यात आली आहे. दोन ड्रोन्सपैकी एक ड्रोन सातपूर आणि अंबड पोलिस ठाणे हद्दीत तर दुसरा ड्रोन भद्रकाली आणि पंचवटी हद्दीत फिरविण्यात आला. याद्वारे नागरिकांनी घराबाहेर पडू नयेत, गर्दी करू नये आदी सूचना करण्यात आल्यात. लवकरच आणखी सहा ड्रोन घेण्याचा विचार पोलिस प्रशासन करीत आहे. यामुळ गल्लीबोळांमध्ये गर्दी करणाऱ्या नागरिकांचे छायाचित्र टिपण्यात येत आहे. याच छायाचित्रांच्या आधारे संचारबंदी नियम मोडणाऱ्या नागरिकांवर गुन्हे दाखल करण्यात येणार आहे. दरम्यान, काही ठिकाणी ड्रोन पाहण्यासाठी नागरिक घराबाहेर पडलेत तर काही ठिकाणी ड्रोनमध्ये आपली छबी येऊ नये यासाठी नागरिकांनी प्रयत्न केले. ड्रोनचा प्रभावी वापर करण्यासाठी प्रयत्न असल्याचे पोलिसांनी स्पष्ट केले.