‘ओबीसींची जातीनिहाय जनगणना करा’

म. टा. वृत्तसेवा, कळवण

मराठा समाजाला त्यांच्या हक्काचे आरक्षण देताना ओबीसी समाजाच्या आरक्षणाला कोणताही धक्का लावू नये. त्यामुळे राज्यातील संपूर्ण ओबीसींची जातीनिहाय जनगणना करण्यात यावी, अशी मागणी कळवण तालुका ओबीसी समाजाच्या बैठकीत करण्यात आली.

कळवण शिक्षण संस्थेचे संचालक व तेली समाजाचे अध्यक्ष व्ही. के. व्यवहारे यांच्या अध्यक्षतेखाली शिंपी समाज मंगल कार्यालयात झालेल्या बैठकीत हा निर्णय घेण्यात आला. मंचावर बैठकीचे निमंत्रक समता परिषदेचे तालुकाध्यक्ष शशिकांत बागुल, भाजपचे नंदकुमार खैरनार, डॉ. अनिल महाजन, बारा बलुतेदार संघटनेचे तालुकाध्यक्ष बोरसे, बाजार समितीचे संचालक रविकांत सोनवणे, कृष्णा बच्छाव, लाडशाखीय वाणी समाजाध्यक्ष डी. आर. महाजन आदी मान्यवर उपस्थित होते. सुरक्षित वावरच्या नियामांच्या पालन करीत ही बैठक पार पडली. तसेच येत्या गुरुवारी २६ नोव्हेंबरला कळवण तालुका ओबीसी समाजाच्या वतीने प्रशासकीय इमारतीवर मोर्चा काढण्याचेही बैठकीत ठरविण्यात आले.