दक्षता जागृती सप्ताह साजरा
म. टा. प्रतिनिधी, नाशिक
केंद्रीय दक्षता आयोगातर्फे दक्षता जागृती सप्ताह साजरा केला जात असून, त्या अंतर्गत युवा कार्यक्रम भारत सरकार नेहरू युवा केंद्र संलग्न शक्ती विकास अॅकॅडमी या संस्थेच्या वतीने युवकांना संस्थेचे अध्यक्ष मनोहर जगताप यांनी दक्षता जागरूकतेची शपथ देऊन मार्गदर्शन केले. 'एकात्मता आणि इमानदारी एक जीवनशैली' या संकल्पनेसह हा दक्षता सप्ताह साजरा करण्यात आला.
भ्रष्टाचाराचा परिणाम राजकीय विकास, लोकशाही, आर्थिक विकास, पर्यावरण, लोकांचे आरोग्य अशा अनेक बाबींची अधोगती करते. म्हणूनच भ्रष्टाचाराचे निवारण करण्याच्या प्रयत्नांकडे जनतेने संवेदनशील व प्रवृत्त होणे अत्यावश्यक आहे. भ्रष्टाचार मुक्ततेसाठी सर्व संस्था व विभागांना प्रभावी प्रतिबंधात्मक उपाय ओळखून त्यांच्या अंमलबजावणीत पारदर्शकता व जबाबदारी वाढविण्यासाठी सल्ला देत आहे. दक्षता जागृती सप्ताहाचा हेतू भ्रष्टाचाराच्या दुष्परिणामांबद्दल मोठ्या प्रमाणात जनजागृती करणे हा आहे, असे जगताप म्हणाले. या प्रसंगी बहुसंख्येने तरुण उपस्थित होते.