नोव्हेंबरपासून सकाळी ९ ते दुपारी ३ पर्यंत कामकाज
नोव्हेंबरपासून अंमलबजावणी
म. टा. खास प्रतिनिधी, नाशिक
जिल्ह्यातील १८ राष्ट्रीयकृत बँकेच्या ३८६ शाखेच्या वेळेत क्षेत्रनिहाय बदल १ नोव्हेंबरपासून होणार आहे. त्यामुळे रहिवासी क्षेत्र, व्यापारी क्षेत्र, इतर कार्यालयासाठी असलेल्या वेळा आता एकसमान राहणार नाही. त्यामुळे ग्राहकांना या बदलातून दिलासा मिळणार आहे. वेळेत झालेल्या बदलाची माहिती बँक ऑफ महाराष्ट्राच्या वेबसाइटवर प्रसिद्ध करण्यात आली असून ती प्रत्येक बँकेच्या फलकावरही लावण्यात येणार आहे.
बँकिंगमधील सुधारणा करण्यासाठी केंद्र सरकारचे प्रयत्न सुरू आहेत. त्यामुळे ईज २० अन्वये भारतीय बँकिंग संघटना यांनी ग्राहकांसाठी देशभर बँकेच्या कामकाजाच्या वेळेत क्षेत्रनिहाय बदल केले आहे. रहिवासी क्षेत्रात असलेल्या बँका सकाळी ९ ते ४ वाजेपर्यंत सुरू राहणार आहे. तर ग्राहकांसाठी या बँकेची वेळ सकाळी ९ ते दुपारी ३ पर्यंत असणार आहे. त्याचप्रमाणे व्यापारी क्षेत्रातील बँकेची वेळ सकाळी ११ ते सायंकाळी ६ पर्यंत राहणार आहे. तर ग्राहकांसाठी सकाळी ११ ते सायंकाळी ५ पर्यंत असणार आहे. इतर कार्यालयासाठी सकाळी १० ते ५ व ग्राहकांसाठी बँकेची वेळ सकाळी १० ते ४ असणार आहे.
जिल्ह्यात एकूण १८ राष्ट्रीयकृत बँका असून, त्यात स्टेट बँक, महाराष्ट्र बँक यांच्या शाखा मोठ्या प्रमाणात आहे. या राष्ट्रीयकृत बँकेत अलाहाबाद बँक, आंध्र बँक, बँक ऑफ बडोदा, बँक ऑफ इंडिया, बँक ऑफ महाराष्ट्र, कॅनरा बँक, सेंट्रल बँक ऑफ इंडिया, कॉर्पोरेशन बँक, इंडियन बँक, ओव्हरसीज बँक, इंडियन बँक, ओरिएंटल बँक ऑफ कॉमर्स, पंजाब, सिंध बँक, पंजाब नॅशलल बँक, स्टेट बँक, सिडिंकेट बँक, युनियन बँक ऑफ इंडिया, युनायटेड बँक, युनायटेड कमर्शियल बँक यांचा समावेश आहे. या सर्व बँकेचे जिल्हयात ३८६ शाखा आहे.
जिल्ह्यातील १८ राष्ट्रीयकृत बँकेच्या ३८६ शाखेच्या वेळेत १ नोव्हेंबरपासून क्षेत्रनिहाय बदल होणार आहे. त्यासाठी माहिती बँक ऑफ महाराष्ट्राच्या वेबसाइटवर दिली असून प्रत्येक बँकेतही फलकावर ही सूचना लावण्यात येणार आहे.
भारत बर्वे, व्यवस्थापक, अग्रणी बँक