म. टा. प्रतिनिधी, नाशिक
नाशिक जिल्हा खो-खो संघटनेच्या खेळाडूंनी गेल्या दोन वर्षांतील आपल्या कामगिरीचा आढावा एका निवेदनाद्वारे राष्ट्रवादी काँग्रेसचे राष्ट्रीय अध्यक्ष तथा माजी कृषी मंत्री शरद पवार यांना दिले. त्यानंतर पवार यांनीही त्यास तात्काळ प्रतिसाद देत या खेळाडूंच्या पाठीवर कौतुकाची थाप दिली. भविष्यात याहूनही चांगली कामगिरी तुम्ही कराल, असा विश्वास व्यक्त केला.
गेल्या दोन वर्षांपासून मुलींचे अद्यावत खो-खो प्रशिक्षण केंद्र छत्रपती शिवाजी स्टेडियम नाशिक येथे जिल्हा क्रीडाधिकारी कार्यालयाच्या माध्यमातून उभे केले आहे. येथील मुली जिल्हा परिषदेच्या शासकीय कन्या शाळेत तर मुले श्रीराम विद्यालय, पंचवटी येथे शिक्षण घेत आहेत. शासकीय कन्या शाळेच्या खो-खो खेळाडूंनी राज्य व राष्ट्रीय स्तरावर देदीप्यमान कामगिरी केली असून त्यातील निशा वैजल, मनीषा पडेर व सोनाली पवार या तीन खेळाडूंनी राष्ट्रीय स्तरावर महाराष्ट्राचे प्रतिनिधित्व करून सुवर्ण पदकाला गवसणी घातली आहे. नाशिक जिल्हा परिषदेच्या इतिहासात प्रथमच त्यांच्या शाळेत शिकणाऱ्या खेळाडूंनी राष्ट्रीय स्तरापर्यंत धडक मारली आहे. या कामगिरीबद्दल या खेळाडूंचे कौतुक करण्यात आले. या प्रसंगी नाशिक जिल्ह्याचे पालकमंत्री छगन भुजबळ, आमदार हिरामण खोसकर, आमदार सरोज अहिरे, राष्ट्रवादीचे जिल्हाध्यक्ष रवींद्र पगार, कोंडाजीमामा आव्हाड, रंजन ठाकरे आदी मान्यवर उपस्थित होते.