भुजबळांचे सरकारवर जोरदार टिकास्त्र

म. टा. वृत्तसेवा, येवला

आमदार छगन भुजबळ यांनी गुरुवारी (दि.२६) येवला तालुक्यासह मतदार संघात येणाऱ्या निफाड तालुक्यातील गावांमध्ये भेट देत विकास कामांची उदघाटन अन् भूमिपूजन केले. तालुक्यातील अनेक ठिकाणच्या कार्यक्रमात आमदार छगन भुजबळ यांनी कधी बोचऱ्या शब्दात, तर कधी आपल्या आक्रमक भुजबळ स्टाईलने सरकारवर टिका केली.

तालुक्यातील कोटमगाव येथील ११ केव्हीए क्षमतेच्या वीज उपकेंद्राचे उद्घाटन भुजबळ यांच्या हस्ते झाले. यावेळी तालुक्यातील राष्ट्रवादीचे ज्येष्ठ नेते माणिकराव शिंदे, अंबादास बनकर, राधाकिसन सोनवणे, महेंद्रशेठ काले, संजय बनकर आदी उपस्थित होते. राज्य सरकारवर पाच लाख कोटींहून अधिक कर्ज झाले आहे. मात्र, त्यातून कोणती विकासकामे झाले हा सवाल केल्यास विधिमंडळाच्या अधिवेशनात त्यांच्याकडे कुठलेही उत्तर नसते. उत्तर देता येत नसल्याने सत्ताधारी मंत्री सभागृहात धावून येतात, याकडे लक्ष वेधत सरकार शेतकरी, सर्वसामान्य शेतकऱ्यांच्या प्रश्नांबाबत सरकार संवेदनशील नसल्याचा थेट आरोप भुजबळ यांनी येवला दौऱ्यात केला.