म. टा. वृत्तसेवा, नाशिकरोड
जेलरोडच्या दसक येथे पती-पत्नीच्या वादातून पतीने रागाच्या भरात डोक्यात बॅट मारून पाच वर्षाच्या मुलाची हत्या केल्यामुळे खळबळ उडाली आहे. पत्नीच्या तक्रारीवरून उपनगर पोलिस ठाण्यात पतिविरुद्ध खुनाचा गुन्हा दाखल झाला असून पोलिसांनी पतीला अटक केली आहे.
सपना भीमराव खंडारे (वय २५, रा. विराजनगर, गॅलॅक्सी स्कूलसमोर, दसक, जेलरोड) यांनी तक्रार दिली. त्यानुसार सपना ही पती भीमराव व मुलगा आर्यन (वय ५) यांच्यासह राहते. मुलगी हर्षदा (वय ७) मालसेलू येथे आजोळी शिकण्यासाठी गेली आहे. पती भीमराव हा मजुरी करतो. पत्नीवर चारित्र्याचा संशय घेऊन त्याने डिसेंबरमध्ये तिला मारहाण केली होती. त्यामुळे सपना ही मुलांसह मालसेलू (ता. हिंगोली, जि. परभणी) येथे माहेरी निघून गेली होती. आधारकार्ड तयार करण्याच्या बहाण्याने भीमरावने २७ जानेवारी रोजी सपनाला मुलासह नाशिकला येण्यास सांगितले. येथे आल्यानंतर भीमराव दोन-तीन दिवस व्यवस्थित राहिला. नंतर ३१ जानेवारीला सायंकाळी सहा वाजता भीमराव कामावरून घरी आला. काही वेळानंतर आजारी पत्नीशी मागील भांडणाची कुरापत काढली. पत्नीवर चारित्र्याचा संशय घेऊन मुलाच्या खेळण्यातील लाकडी बॅटने तिला मारहाण केली. गंभीर मारहाणीमुळे आई रडू लागल्याचे पाहून पाच वर्षाचा मुलगा आर्यनही रडू लागला. त्यामुळे संतापलेल्या भीमरावने बॅटने मुलाला डोक्यावर व गुडघ्यावर मारहाण केली. यावेळी मुलगा व सपनाच्या ओरडण्याचा आवाज ऐकून नागरिकांनी धाव घेतली. त्यांनी भीमरावच्या मदतीने जखमी मुलाला दुचाकीवर बिटको रुग्णालयात नेले. नंतर जिल्हा शासकीय रुग्णालयात दाखल केले होते.
संशयितास पोलिसांची अटक
प्रकृती खालावल्याने पुढील उपचारासाठी आर्यनला मुंबईतील जे.जे. रुग्णालयात नेण्यात आले. उपचार घेत असताना बुधवारी (दि. ५) सकाळी साडेआठ वाजता त्याचा मृत्यू झाला. मुंबई पोलिसांनी सपनाने प्राथमिक माहिती दिली. नंतर मुलाचा मृतदेह मालसेलू (हिंगोली) येथे नेऊन अंत्यसंस्कार केले. तिकडून नाशिकला आल्यावर सपनाने उपनगर पोलिस ठाणे गाठून घटनेची पोलिसांना माहिती देत पतीविरुद्ध तक्रार दाखल केली. त्यानुसार पोलिसांनी खुनाचा गुन्हा दाखल करून भीमरावला अटक केली.