चुंचाळेत नववसाहतींना रस्त्यांची प्रतीक्षाच

कच्च्या रस्त्यावरून नागरिकांची कसरत

म. टा. वृत्तसेवा, सातपूर

महापालिकेत नेहमीच वादग्रस्त असलेल्या अंबड लिंकरोडच्या बाजूलाच चुंचाळे गाव वसले आहे. चुंचाळे गावाचा महापालिकेत समावेश झाल्यापासून आजतागायत मूलभूत सुविधा मिळालेल्या नाहीत. त्यामुळे येथील नागरिकांना पक्क्या रस्त्यांसाठी अद्याप प्रतीक्षाच आहे. मनपाने याकडे लक्ष घालण्याची मागणी नागरिकांनी केली आहे.

मनपाच्या समावेशानंतर याठिकाणी नव वसाहत झाली. त्यामध्ये नागरिकांना मुलभूत सुविधा देण्यात आलेल्या नाहीत. अशात आम्हाला प‌क्के रस्ते कधी मिळणार, असा सवाल रहिवासी उपस्थित करत आहेत. ऐन पावसाळ्याच्या दिवसात कच्च्या रस्त्यांवरून प्रवास करताना सर्वांनाच कसरत करावी लागत आहे. या परिस्थितीकडे स्थानिक नगरसेवक व महापालिकेने लक्ष घालावे, अशी मागणीही नव वसाहतीतील रहिवाशांनी व्यक्त केली आहे. सातपूरच्या वाढत्या लोकवस्ती चुंचाळे शिवाराचे दोन भाग झालेत. यात एक भाग नवीन नाशिक सिडकोत मोडला जातो, तर दुसरा सातपुरला जोडला आहे.

वरचे चुंचाळे म्हणून नवीन ओळख असलेल्या नव वसाहतीत रस्त्यांची कामे कधी होणार असा सवाल रहिवाशांसह बांधकाम व्यावसायिक देखील उपस्थित करत आहेत. वरचे चुंचाळे येथे कमी भावात घरकुले उपलब्ध होत असल्याने कामगारांना ती घेण्यास परवडतात. परंतू महापालिकेकडून नागरी सुविधा मिळत नसल्याने रहिवाशांनी नाराजी व्यक्त केली आहे.