उत्तर महाराष्ट्रात थंडीची लाट

नाशिकः उत्तर महाराष्ट्रात थंडीने पुन्हा जोर पकडला असून राज्यातील सर्वता कमी तापमानाची नोंद गुरुवारी नाशिक शहरात झाली. नाशिक शहरात कमाल तापमान २९.४ तर किमान तापमान ७.२ इतके नोंदवले गेले.उत्तर महाराष्ट्रात मोठ्या प्रमाणात थंडीची लाट आली असून संपूर्ण दिवसभर गारवा जाणवू लागला आहे. बहुतांश शहरात किमान तापमान १२ ते ९ अंश सेल्सिअस आहे.

मागील महिन्यात थंडीने चांगला जोर धरला होता. आठ दिवस शहर गारठून गेले होते. राज्यातील सर्वात निच्चांकी तापमानाची नोंद नाशिक शहरात झाली होती. त्यानंतर थंडी अचानक गायब झाली मात्र गेल्या दोन दिवसांपासून वातावरणात अचानक गारवा निर्माण झाला असून पुन्हा शेकोट्या पेटू लागल्या आहेत. गेल्या आठवडाभरापासून किमान तापमान १५ अंशांच्या खाली उतरले आहे.