देव द्या उपक्रमाला प्रतिसाद
...
म. टा. प्रतिनिधी, नाशिक
विद्यार्थी कृती समितीच्या वतीने गणेश विसर्जनाच्या निमित्ताने 'देव द्या, 'देव पण घ्या' या उपक्रमात चोपडा लॉन्सजवळील गोदापार्क येथे शहरातील सुमारे १० हजार ३२८ भाविकांनी गणेशमूर्ती दान दिल्याची माहिती विद्यार्थी कृती समितीने दिली.
प्लास्टर ऑफ पॅरिसच्या मूर्ती, रासायनिक रंगकाम व इतर सौंदर्यप्रसाधने व निर्माल्यामुळे गोदावरीचे मोठ्या प्रमाणावर प्रदूषण होते. त्यामुळे विद्यार्थी कृती समितीतर्फे गेल्या नऊ वर्षांपासून 'देव द्या, देवपण घ्या' हा उपक्रम राबविण्यात येतो. गणेशोत्सवातील १० दिवस सार्वजनिक गणेशोत्सव मंडळे व घरोघरी जाऊन विद्यार्थी कृती समितीच्या कार्यकर्त्यांनी जनजागृती करणारे पत्रके घराघरात वाटली होती. सोशल मीडियाच्या माध्यमातून देखील प्रभावी प्रचार, तसेच आवाहन करण्यात आले होते. नाशिकच्या गोदाप्रेमी भाविकांनी या आवाहनाला भरभरून पाठिंबा दिला. विसर्जनाच्या दिवशी सकाळी नऊ वाजेपासूनच विद्यार्थी कृती समितीचे सुमारे तीनशे कार्यकर्ते चोपडा लॉन्सजवळील गोदापार्कच्या प्रवेशद्वाराजवळ तयार केलेल्या मूर्ती संकलन केंद्रावर गणेशमूर्ती दान करण्याचे आवाहन करीत होते. सुमारे सहा फुटांपेक्षा जास्त उंचीच्या विविध मंडळाच्या व घरगुती गणेशोत्सवातील मूर्ती यावेळी दान करण्यात आल्या. कार्यक्रमाच्या यशस्वीतेसाठी आकाश पगार, विशाल गांगुर्डे, जयंत सोनवणे, रोहित कळमकर, राहुल मकवाना, संकेत निमसे, तुषार गायकवाड, मयूर पवार, अविनाश बरबडे, भावेश पवार, सागर दरेकर, साईराज निकम, सिद्धेश दराडे, अमोल भांड, गणेश शेळके, लोकमान्य मल्टिपर्पज सोसायटीचे व्यवस्थापक प्रकाश चितोळकर, सुशांत पाटील, दिगंबर काकड, वैष्णवी जोशी, मदन म्हैसधुणे, दीपाली जाधव, भगवान भोये, स्नेहल उफाडे, नरेंद्र वाणी आदी कार्यकर्त्यांनी परिश्रम घेतले.