महाराष्ट्र टाइम्स कल्चर क्लबतर्फे आयोजित कार्यशाळेत मार्गदर्शन
...
म. टा. प्रतिनिधी, नाशिक
खमंग फराळ दिवाळीच्या सुटीची मज्जा आणखीनच वाढवतो. हा फराळ अधिकाधिक लज्जतदार, रूचकर व्हावा व त्यासाठी महिलावर्गाला नवनवीन पदार्थ शिकण्याची संधी मिळावी, यासाठी महाराष्ट्र टाइम्स कल्चर क्लबच्या माध्यमातून 'दिवाळी फराळ बनवा' या दोन दिवसीय कार्यशाळेचे आयोजन करण्यात आले होते. महात्मानगर येथील शीतल अपार्टमेंटमध्ये मंगळवार व बुधवार या दोन दिवसांत तिखट-गोड फराळाचे पदार्थ शिकविण्यात आले.
वर्षातील सर्वात मोठा सण असलेल्या दिवाळीसाठी फराळ बनविण्यात महिलावर्ग दंग होत असतात. यंदा नेहमीच्या पदार्थांबरोबरच काहीतरी नवीन शिकण्यास मिळावे व दिवाळीचा काळ अधिक चविष्ट व्हावा, यासाठी कल्चर क्लब अंतर्गत कार्यशाळा घेण्यात आली. काजू कतली, चॉकलेट मावा रोल, काजू कलिंगड, तिरंगा करंजी, लवंग लतिका, चंपाकळी, चिरोटे, चकली, भावनगरी, गार्लिक शेव, चनाडाळ, लक्ष्मीनारायण चिवडा, ग्रीन चिवडा, मिनी समोसा, मोहन थाळ आदी पदार्थ या कार्यशाळेत शिकविण्यात आले. शेफ ममता मुंदडा यांनी हे पदार्थ उपस्थितांना शिकवले. त्याबरोबरच, हे पदार्थ अधिकाधिक खमंग व्हावे, यासाठी टिप्सही देण्यात आल्या. उपस्थितांनी फराळाच्या मेजवाणीचा आनंदही लूटला. यंदाची दिवाळी या पदार्थांमुळे आणखी भन्नाट होणार असल्याच्या प्रतिक्रिया यावेळी उपस्थितांनी व्यक्त केल्या.