म. टा. प्रतिनिधी, नाशिक
मनातील भावनांचा ठाव घेणाऱ्या शब्दांतून जीवनाचे पैलू उलगडणाऱ्या गाण्यांचे बहारदार सादरीकरण. या गाण्यातून सुरांचा घेतला जाणारा मागोवा अन् त्या शब्दांसूरांतून घडणारा अनोखा मिलाफ. शब्द आणि सूरांनी रसिकांना मोहित करणाऱ्या मैफलीची रंगत उत्तरोत्तर वाढत गेली अन् नाशिककरांची रात्र सुरमयी ठरली. निमित्त होते, वनबंधू परिषदेतर्फे आयोजित 'दिल से' या सुरमधूर गीतांच्या मैफलीचे.
वनबंधू परिषदेच्या नाशिक चॅप्टरच्या १९ व्या वर्धापनदिनानिमित्त शुक्रवारी (दि.२७) रात्री नऊ वाजता प्रसिद्ध गायक आणि संगीतकार ए. आर. रहमान यांच्या गाण्यांवर आधारित 'दिल से' ही आयोजित सुरेल मैफल महाकवी कालिदास कलामंदिरात रंगली. त्यावेळी जिल्हाधिकारी सुरज मांढरे, परिषदेचे संरक्षक रामरतन करवा, नेमिचंद पोद्दार, प्रदीप बूब, अशोक तापडिया, सुनील चांडक, प्रकाश लढ्ढा, अध्यक्ष अनिल मेहता यांसह पदाधिकारी मंचावर होते. या मैफलीत सादर होणाऱ्या प्रत्येक गाण्याला रसिकांची भरभरून दाद मिळाली. मृण्मय तिरोडकर, चैतन्य कुलकर्णी, आशुतोष जोशी, रसिका गानू, प्रांजली बर्वे यासह सहगीतकारांनी आपल्या सुरांनी मैफलीत रंग भरले. 'रंग दे बसंदी','दिल है छोटासा','मुकाबला','तु ही रे','जिया रे जिया','चले चलो','मितवा','वंदे मातरम्' अशी अनेक सदाबहार गाणी सादर करत त्यांनी रसिकांवर स्वरांची मोहिनी टाकली.
मैफलीतील प्रत्येक गाण्यांच्या शब्दप्रतिभांनी रसिकांना अतंर्मुख केले. गाण्यांचे शब्द, सूर, ताल, लय, संगीत आणि रसिकांची दाद अशी ही मैफल उत्तरोत्तर रंगत गेली. या सुरेल मैफलीचे दिग्दर्शन मिलिंद ओक यांनी केले. प्रवीण पोतदार यांनी केले. नाशिककरांनी या सुरमयी मैफलीचा अनुभव घेण्यासाठी गर्दी केली.