बी. के. ग्रुप ऑफ एज्युकेशनचा उपक्रम
म. टा. प्रतिनिधी, नाशिक
केंद्रीय लोकसेवा आयोग, राज्य लोकसेवा आयोग यासह मेगाभरती अंतर्गत होणाऱ्या स्पर्धा परीक्षेचे दिव्यांग उमेदवारांना मोफत मार्गदर्शन मिळावे, या हेतूने बी. के. एज्युकेशन अॅण्ड वेल्फेअर सोसायटीतर्फे उपक्रम हाती घेण्यात आला आहे. या अंतर्गत दिव्यांग उमेदवारांना स्पर्धा परीक्षेचे धडे देण्यात येणार असून, यासाठी उमेदवारांनी नावनोंदणी करण्याचे आवाहन सोसायटीतर्फे करण्यात आले आहे.
दिव्यांग उमेदवारांना स्पर्धा परीक्षेतून अधिकारी होण्याचे स्वप्न सत्यात उरविण्यासाठी बळकटी मिळावी, या हेतूने बीके ग्रुप ऑफ एज्युकेशनतर्फे मोफत मार्गदर्शन कार्यक्रम राबविण्यात येत आहे. सध्या विविध शासकीय विभागांसह खासगी संस्थेत भरती प्रक्रिया सुरू आहे. यात दिव्यांग उमेदवारांना विशेष प्राविण्य पटकाविता यावे तसेच भरतीसाठी अभ्यासाचे साहित्य या उमेदवारांना उपलब्ध व्हावे म्हणून हा उपक्रम राबविण्यात जात आहे.
या सोसायटीतर्फे सातशेपेक्षा अधिक दिव्यांग उमेदवारांना स्पर्धा परीक्षेचे मार्गदर्शन यापूर्वी करण्यात आले आहे. यातून अनेक विद्यार्थ्यांनी यश संपादित केले. यंदाही हा उपक्रम राबविण्यात येणार आहे. यासाठी ४० टक्क्यांपेक्षा अधिक दिव्यांगत्व असलेला उमेदवार पात्र असेल. दहावी उत्तीर्ण दिव्यांगांना देखील या कार्यक्रमातून मार्गदर्शन घेता येणार आहे. यासाठी १५ ऑगस्टपर्यंत नावनोंदणी करावी. इच्छुकांनी बी. के. ग्रुप ऑफ एज्युकेशन, पहिला मजला, गजानन प्लाझा, घारपुरे घाट रोड, शासकीय पशुवैद्यकीय दवाखान्याजवळ, अशोकस्तंभ, नाशिक येथे किंवा www.bkeducation.in या वेबसाइटला भेट द्यावी, असे आवाहन संस्थेचे अध्यक्ष किशोर येलमामे आणि सचिव भगवान येलमामे यांनी केले आहे.