अमेरिकन वकिलातीमार्फत तक्रारदारांचा शोध

म. टा. खास प्रतिनिधी, नाशिक

अमेरिकन वकिलातीमार्फत फसवणूक झालेल्या अमेरिकन नागरिकांचा शोध घेऊन त्यांचा जबाब नोंदविण्याचे काम सायबर पोलिस करणार आहेत. यासाठी अमेरिकन वकिलातीशी संपर्क सुरू असल्याची माहिती सूत्रांनी दिली. या आंतराराष्ट्रीय कॉल सेंटर फसवणुकीच्या गुन्ह्यात अद्याप प्रत्यक्ष फसवणूक झालेल्या नागरिकांचे जबाब नोंदविण्यात आलेले नाही.

सोशल सिक्युरिटी आयडीशी गुन्हा लिंक झाल्याचा व्हॉइस मॅसेज पाठवून त्याद्वारे अमेरिकन नागरिकांना गंडा घालणाऱ्या आंतराराष्ट्रीय कॉल सेंटर प्रकरणाचा तपास सायबर पोलिस स्टेशनमार्फत सुरू आहे. या प्रकरणी पोलिसांनी अटक केलेल्या गुजरात राज्यातील दीपेक्स चंद्रकांत मोदी आणि धीमंत रावल आणि नाशिक शहरातील इतर संशयितांची रवानगी न्यायालयीन कोठडीत करण्यात आली आहे.

दीपेक्स मोदी अमेरिकेतून रिचर्ड जॉन्सन या संशयित आरोपीकडून आलेले बल्क मोबाइल क्रमांक नाशिकमध्ये पुरविण्याचे काम करीत होता. पोलिसांनी दीपेक्सच्या बँक खात्याची तपासणी हाती घेतली असून, त्यात अद्याप फारसे काही मिळालेले नाही. याबाबत बोलताना सायबर पोलिस स्टेशनचे पोलिस निरीक्षक देवराज बोरसे यांनी सांगितले की, संशयित आरोपींनी अमेरिकन नागरिकांची फसवणूक केली आहे. एका व्यक्तीची किमान ५०० अमेरिकन डॉलर म्हणजे आजच्या दराने एका व्यक्तीची किमान ३५ हजार रुपयांची फसवणूक झाल्याचे प्रथम दर्शनी दिसते. मात्र, यासाठी प्रत्यक्ष फसवणूक झालेल्या व्यक्तीचे जबाब नोंदवणे आवश्यक आहे. स्कायपीच्या माध्यमातून फसवणूक झालेल्या संभाव्य व्यक्तींचे मोबाइल क्रमांक मिळाले आहेत.

अमेरिकन वकिलातीमार्फत फसवणूक झालेल्या संभाव्य अमेरिकन नागरिकांचे जबाब नोंदविल्यानंतरच या गुन्ह्याची व्याप्ती समोर येऊ शकेल, असे बोरसे यांनी स्पष्ट केले. या गुन्ह्यात अजून दोघा भारतीयांसह अमेरिकेतील जॉन्सन हा संशयित अटक होणे बाकी आहे. या प्रकरणी सप्टेंबर महिन्याच्या शेवटच्या आठवड्यात उपनगर पोलिस स्टेशनमध्ये गुन्हा नोंदवण्यात आला होता. नाशिकरोड परिसरातील पासपोर्ट ऑफिसच्या वर असलेल्या एका कॉल सेंटरमधून अमेरिकन नागरिकांची आर्थिक लूट करण्यात येत होती. सोशल आयडीशी संबंधित व्हॉइस मॅसेज पाठवून हा प्रकार सुरू होता.