मालेगावात काँग्रेस-सेना युती, रशीद शेख महापौर

मटा ऑनलाइन वृत्त । मालेगाव

मालेगाव महापालिकेत शिवसेनेचं 'धनुष्य' आपल्या 'हाता'त घेऊन काँग्रेसनं महापौरपदाचं लक्ष्य साध्य केलं आहे. माजी आमदार रशीद शेख यांच्या गळ्यात महापौरपदाची माळ पडली आहे. शेख यांनी ४१ मतं मिळवून मालेगाव महागठबंधन आघाडीचे नबी अहमदुल्ला यांचा चार मतांनी पराभव केला. त्यांच्या विजयात एमआयएमचाही मोठा वाटा आहे.

मालेगाव महापालिकेच्या निवडणुकीत कुठल्याच पक्षाला स्पष्ट बहुमत मिळालं नव्हतं. काँग्रेसनं सर्वाधिक २८ जागा जिंकल्या होत्या, तर राष्ट्रवादी २० जागांसह दुसऱ्या स्थानावर होती. स्वाभाविकच, सत्तास्थापनेसाठी या दोघांनीही जोरदार मोर्चेबांधणी केली. त्यात काँग्रेस नेते यशस्वी ठरले. शिवसेनेच्या १३ नगरसेवकांचा पाठिंबा मिळवून त्यांनी ४१चा आकडा गाठला. बहुमतासाठी आवश्यक असलेली ४३ ही 'मॅजिक फिगर' त्यांना गाठता आली नाही. परंतु, एमआयएमचे सात नगरसेवक तटस्थ राहिल्यानं रशीद शेख यांच्या विजयावर शिक्कामोर्तब झालं. भाजपचे दोन नगरसेवक या निवडणुकीला अनुपस्थित राहिले.

मालेगाव महागठबंधन आघाडीचे नबी अहमदुल्ला यांना ३७ मतं मिळाली.